Исереккә диңгез тубыктан

Исереккә диңгез тубыктан
Кисәтүләр, аңлатуларга, хәтта зур күләмдәге штрафларга да карамастан, юл һәлакәтләре кимеми.
Сәбәпләре бик күп, әмма иң күп очраганнары тизлекне арттыру, юл хәрәкәте кагыйдәләре буенча рөхсәт ителмәгән урында каршы як полосага чыгу һәм йөрәкне иң әрнеткәне, белә торып спиртлы эчемлек кулланып руль артына утыру. Иң кызганычы – шулар нәтиҗәсендә бер гаепсез кешеләрнең зыян күрүе.
Яшерен түгел, ЮХИДИ хезмәткәрләрен транспорт белән идарә итүчеләр өнәп бетерми. Бар кеше дә килешер, дип уйлыйм, алар булмаса, юлларда бөтенләй тәртипсезлек хөкем сөрер иде. ЮХИДИ хезмәткәрләре белән берлектә үткәргән рейдлар вакытында моңа тагын кат–кат инанасың. Мондый рейдлар Арчада даими рәвештә оештырыла һәм анда Россия Эчке эшләр министрлыгының Арча районы буенча бүлеге барлык хезмәткәрләре катнаша. Алар көндез дә, төнлә дә юлларда тәртип саклый. Төннәрен, кичке 5тән төнге 12гә кадәр, берничә экипаж берничә юнәлештә йөри.
23–24 майда үткән рейд вакытында исерек хәлдә руль артына утырган 4 кеше тоткарланган. Шуларның өчесенең машина йөртү таныклыгы бар, ә берсенеке бөтенләй юк. Беренчеләренә хәзер 30 мең сум штраф түләргә һәм 1,5–2 елга машина йөртү хокукы биргән таныклыксыз калырга туры киләчәк. Ә соңгысына я 30 мең сум штраф яки 15 тәүлек административ арест карала. Моннан тыш, машиналар штрафстоянкага эвакуацияләнә, эвакуаторга төягән һәм бушаткан өчен 1500 сум, штрафстоянкада торган өчен сәгатьләп түләргә туры киләчәк.
Бу көннәрдә барлыгы 84 юл хәрәкәте кагыйдәләрен бозу очраклары теркәлгән. Шуларның 25е тизлекне арттырган өчен. “Юллар яхшы булудан файдаланып чапмасыннар, аның ни белән бетәргә мөмкинлеге турында онытмасыннар иде”,—ди ЮХИДИ бүлекчәсе җитәкчесе Илдар Нотфуллин. Пычрак номерлар белән юлга чыккан 21, куркынычсызлык каешы такмыйча йөргән 21 кешегә штраф түләргә туры киләчәк. Тиешсез урында каршы як полосага чыгучы 1 машина йөртүчегә 5000 сум штраф яки 4 айдан 6 айга, кабат эләксә, 1 елга таныклыксыз калу яный.
Алда балаларның җәйге каникуллары. Бу чорда юлларда аеруча контроль кирәк. ЮХИДИ хезмәткәрләре тарафыннан гына түгел. Ата–аналар да балаларын игътибар үзәгеннән читкә җибәрмәскә, юл хәрәкәте кагыйдәләрен искә төшереп торырга тиеш. Велосипедта йөргәндә дә аларны белү һәм аеруча саклык кирәк. 24 майда, мәсәлән, Арча үзәгендәге “Надежда” кибете янында 2002 елгы бер малайны машина бәрдерде. Бала тән җәрәхәтләре алды. Балаларын йөртү өчен махсус җайланма турында да онытырга ярамый. Беренчедән, ул баланың саклыгы өчен кирәк булса, штрафы зур булуы турында да онытмаска кирәк. Хәзер скутер белән йөрүчеләр дә күбәйде. Скутер белән идарә итүчеләргә дә 16 яшьтән соң таныклык алырга кирәк. Югыйсә, 5 меңнән 15 мең сумга кадәр штраф салыначак. Рейд вакытында таныклыксыз 2 скутер белән идарә итүче тоткарланган. Штрафларны вакытында түләмичә йөргәннәргә дә катгый чара күрелә. Бу юлы шундый 4 беркетмә төзелгән, хәзер эшләре судка җибәрелә, штраф күләме икеләтә арта, бу очракта инде түләтү белән суд приставлары шөгыльләнә. Һәм 15 тәүлеккә кадәр административ арест салына.
Гөлсинә ЗӘКИЕВА