Ул хөрмәткә лаек

Ул хөрмәткә лаек
Һәр ел май аенда Арчаның иң матур паркларының берсендә—Борһанов урамы бәйрәме үткәрелә. Бер урамга гына багышланса да, ул уртак бәйрәм, чөнки анда барлык шәһәр халкы катнаша, күңелле җыр, бию белән үрелеп бара, бүләкләр тапшырыла. Урамның һәр кешесенә диярлек. Хәтта: “Эх, безнең урамда да шундый кеше яшәгән булса икән”,—диючеләр дә булгандыр. Нишлисең, өлешеңә тигән көмешең.
Ә бәйрәм район Советы башкарма комитеты рәисе булып эшләгән чорда район үсешенә зур өлеш керткән Тимерхан Борһановны искә алу белән башланып китте.
—Без аның белән озак еллар бергә эшләдек, гаиләләр белән дус булдык. Мин “Сельхозтехника”ны җитәкләдем. Ул чакта бу урында солы басуы иде. Тимерхан Бор-һанов зур колач җәеп эш башлады,—дип искә алды аны Ислам Зәкиев.
Борһанов урамының үз тарихы, мактауга лаек шәхесләре бар. Аларның берсе дә бу көнне игътибардан читтә калмады. Биредә яшәгән Бөек Ватан сугышы ветераннары Сәлмән Мәүлетов, Шамил Гарәфетдиновны, көнне–төнгә ялгап эшләгән тыл ветераннарын, сугыш чоры балаларын олылап билгеләп үтми һич мөмкин түгел
—Без, сугыш чоры балалары, ачлы–туклы яшәдек, өлкәннәр белән беррәттән басу–кырларда эшләдек, әти дияргә тилмереп үстек. Барысына да саулык, сәламәтлек телим. Мондый олылауга алар чын мәгънәсендә лаек,—диде хезмәт ветераны, шәһәрнең шәрәфле гражданины Илдус Сәгъдиев.
Мәймүнә Гарәфиева, Рәйсә Ибраһимова, Мәүлидә Сибгатуллина, Мөнәвәрә Һидиятуллина, Рәмзия Шакирова, Гадения Фәттрахманова—менә алар сугыш чорында барлык авырлыкларны башларыннан кичергән, хәзер һәр туган көн өчен сөенеп яшәүче тыл ветераннары.
Моннан тыш, бәйрәмдә озын гомер итүчеләр Мөнәвәрә Мөхәммәтҗанова, Саймә Мәрдәнова, 50 ел иңне–иңгә куеп яшәүчеләр Фирдания һәм Әдһәм Шәриповлар, Гөлфия һәм Рафаил Шакировлар, иң яшь Люция һәм Ленар Гарәфиевлар гаиләсе, урамның иң яшь буыны Булат Семенов белән Кирилл Никулин, иң актив кешесе Мансур Туктаров, мактаулы исеме булган Наилә Миннемуллина да бүләкләргә лаек булды.
“Бердәм Россия”нең Арча җирле бүлекчәсе “Үз шәмеңне кабыз” акциясе кысаларында “Җиңү бәйрәме балалар күзлегеннән” дигән фоторәсемнәр бәйгесе оештырган иде. Җиңүчеләргә бүләкне биредә җирле бүлекчә секретаре урынбасары Надия Мифтахетдинова тапшырды. Бү-ләкләрне алуда Тимерхан Борһановның улы, Татарстан Республикасының яшьләр эшләре һәм спорт министры Рафис Борһанов ярдәм иткән.
—Борһанов урамындагы бу бәйрәм дә аның инициативасы белән үткәрелә. “Бердәм Россия” сәяси партиясенең җирле бүлекчәсе, район башкарма комитеты, район яшьләр эшләре, спорт һәм туризм бүлеге, ветераннар советы, мәктәп коллективлары бу башлангычны күтәреп алды һәм дәвам итә,—диде Надия Мифтахетдинова.
Арча мәктәпләре һәм педагогика көллияте укучылары бәйрәмдә чыгыш ясады. Урам бәйрәмен оештыруга өлешләрен керткән мәктәпләр дә бүләксез калмады.
—Тимерханны шулай хөрмәт итүегез өчен зур рәхмәт,—диде соңыннан Асия Борһанова барлык оештыручыларга, бәйрәмгә килүчеләргә, Борһанов урамы халкына мөрәҗәгать итеп .—Ул, чыннан да, мондый мөгамәләгә лаек.
Гөлсинә ЗӘКИЕВА