Сез безгә кушыласызмы

Сез безгә кушыласызмы
Республиканың Министрлар Кабинетында Премьер-министр урынбасары Юрий Камалтынов һәм РФнең Татарстан буенча Наркотикларга контроль федераль хезмәте идарәсе җитәкчесе, полициянең генерал-лейтенанты Фаяз Шабаев рәислегендә видеоконференция булды. Анда район башкарма комитеты җитәкчесе Илшат Галимуллин катнашты.
“Наркотиклардан башка тормыш” айлыгы республикада икенче тапкыр үткәрелә. Аның уңай нәтиҗәсе дә бар. Узган ел акция вакытында 350дән артык наркотиклар белән бәйле җинаятьләр теркәлгән, 60 килограммнан күбрәк наркотик чаралар законсыз кулланыштан алынган.
Утырышта тоткыннар һәм шартлы хөкем ителгәннәр арасында наркотикларга бәйле авыруларны дәвалау һәм тернәкләндерү, наркотик чараларны һәм психотроп матдәләрне куллануга юл куймау, наркотик кулланып, исерек хәлдә транспорт белән идарә итү очракларын бетерү мәсьәләләре каралды.
Наркотик кулланучыларның туберкулез, ВИЧ-инфекция кебек йогышлы чирләр белән авырулары мәгълүм. Наркомания белән авыручылар, гадәттә, 31–40 яшьлекләр.
Наркотикларга каршы көрәшкә җәмәгать оешмаларының да тартылуы әһәмиятле.
Узган ел республикада наркотик кулланып, исерек хәлгә килгән 149 машина йөртүче ЮХИДИ хезмәткәрләре тарафыннан тоткарланган.
Утырыштан соң Арча районы буенча эчке эшләр бүлегенең җинаятьчеләрне эзләү бүлеге җитәкчесе, полиция капитаны Ринат Котдусов белән сөйләштек.
— Узган ел айлык вакытында наркотиклар белән бәйле ике җинаять эше кузгатылды, бер кеше административ җаваплылыкка тартылды, — диде ул. — Быел әлегә тыныч. Районда “Мәк” операциясе дә башланып китте. Яшьләр тупланган урыннарга рейдларга чыгабыз, шикле кешеләр, төркемнәргә, аулак, иске өйләргә игътибар ителә һ.б. Халыкка да мөрәҗәгать итәсе килә: наркотиклар белән бәйле берәр мәгълүмат белсәгез, полициягә 3-12-02 телефонына шалтыратуыгызны сорыйбыз. “Ышаныч әрҗәләре”нә дә теләкләрне, фикерләрне язмача салырга була.
Район үзәк хастаханәсе наркологы Рөстәм Әхмәтҗанов:
— Наркотикларны кулланмаска! — дип катгый итеп әйтә. — Ул юньлегә илтми. Наркотикларның куркыныч икәнен ата–ана баласына кечкенәдән аңлатырга тиеш. Баланы хезмәт, файдалы шөгыль белән тәрбияләсәң, аларның ихтыяр көче нык була. Андыйлар начар гадәтләргә бирешми. Мәктәпләрдә, һөнәр алу учреждениеләрендә наркотест үткәрелде. Наркотик матдәләр кулланучылар ачыкланмады. Районда 8 наркоман, 15 наркотик матдәләр кулланучы бар. Бүгенге көндә республиканың наркодиспансерында дәваланучы юк.
Мәктәпләрдә, уку йортларында да лекцияләр укыла, түгәрәк өстәлләр үткәрелә, ата-аналар белән сөйләшенә, кыскасы, кем нинди чара оештыра ала. Апаз мәктәбенең тәрбия эшләре буенча директор урынбасары Алсу Якупова, “Наркотиклардан башка тормыш” айлыгын ничек үткәрәсез, дигән соравымны ишетүгә:
— У-у, плакатлар күтәреп, урамнарга кадәр чыктык, — диде. — Урамда очраган һәр кешедән “Наркотиклар үсеп килүче яшь буынга бик зыянлы. Бу афәтне юк итүдә бергәләп көрәшик. Сез безгә кушыласызмы?” — дип сорадык, алар: “Кушылабыз, кушылабыз”,– дия-дия акция кәгазенә кул куйдылар. Беренче тапкыр оештырдык без мондый чараны. Балалар тагын чыгабыз, дип торалар.
Румия НАДРШИНА