Ай–яй–яй, татар кызлары матур

Ай–яй–яй, татар кызлары матур
Г.Тукай исемендәге Арча педагогика көллиятендә Бөтендөнья татар конгрессы инициативасы белән “Озын толымлы татар кызы” бәйгесе үткәрелде. Анда Арча, Әтнә, Кукмара, Яр Чаллы уку йортларында белем алучы татар кызлары катнашты. Жюри составында Бөтендөнья татар хатын–кызларының “Ак калфак” оешмасы җитәкчесе Кадрия Идрисова, Арча район хатын–кызлар советы җитәкчесе урынбасары Надия Мифтахетдинова да бар иде.
—Мондый бәйгене без киләчәктә ел да уздыруны планлаштырабыз. Бүгенгесе—беренчесе һәм уңышлы булсын,—диде Арча педагогика көллияте җитәкчесе Гөлнара Гарипова.
Кызлар беренче булып үзләре белән таныштырып үтте. Әле башланып кына килгән тормышларының матур мизгелләрен шигырь юлларына да салганнар, театральләштерелгән күренеш тә тәкъдим иттеләр, җырлау осталыкларын да күрсәттеләр. Бүгенге яшьләрнең ни дәрәҗәдә сәләтле булуына сокланып утырдым.
“Уңган, юмарт та син, гүзәл, тыйнак та син, Җир -ананың үзе шикелле, татар кызы, милләтемнең тапталмас бер көзгесе”, кебек матур сүзләрне татар кызларына багышлап күп яудырды алып баручылар. Белемле дә микән соң алар? Бәйгедә кызларның белемнәрен тикшерү турында да онытмаганнар. Аларның татар халык җырларын, бәйрәм өстәлләрен бизәүче милли ризыкларыбызны, туган җиребезне, тарихи мирасыбызны, мәкальләрне ничек белүләре сорау–җаваплар аша барланды.
—Хатын–кыз ул—һәрьяктан булган. Сылу да, назлы да, акыллы да, тырыш та,—диде Надия Мифтахетдинова.
Чыннан да, аның кулыннан килмәгән эш юк. Ир дә көйли, балалар да бага, тәмле ризыклар да пешерә, эшенә дә барырга өлгерә. Бәйгедә дә аларны төрле яктан сынадылар. Чәчтараш та булдылар, өйдә пешереп алып килгән ризыкларын да тәкъдим иттеләр. Чәкчәк, тавык ите белән борай бәлеше, гөбәдия, урама, камырга төреп, эченә алма, җимеш тутырып пешерелгән каз—бар да өстәл түрендә урын алды. Егет кешегә җитмеш төрле һөнәр дә аз, диләр. Кызларга да кагыла икән бу. Болардан тыш, бәйгедә катнашучылар кул эш-ләрен дә жюри хөкеменә тапшырды, җырлап, биеп тә күрсәтте
“Озын толымлы татар кызы” бәйгесендә беренче урынны эчтәлекле, матур чыгышлары өчен һәрьяктан килгән иң озын толымлы Әтнә авыл хуҗалыгы техникумы студенткасы Айсылу Әхмәдуллина яулады. Кадрия Идрисова аның башына әлеге бәйгенең символы булачак һәм ел да җиңүче озын толымлы татар кызына күчеп барачак ак калфак кидерде. Арча педагогика көллиятеннән Рисәлә Әхмәтханова – икенче, Яр Чаллы төзелеш көллиятеннән Нәзирә Кашапова өченче булды. Арча агросәнәгать көллиятеннән Розалия Газыймова белән социаль-белем бирү академиясенең Арча филиалыннан Илүзә Минһаҗетдинова дүртенче урынны бүлештеләр.
—Озын толым—татар кызының бизәге. Булдыклы татар кызлары гына озын толым үстерә, карап йөртә ала,—диде Кадрия Идрисова һәм җиңүчеләргә бүләкләр тапшырды.
Кызларны бәйгегә әзерләп килгән укытучыларга рәхмәт хатлары тапшырылды.
Гөлсинә ЗӘКИЕВА