Яңа уку елына яңа ноутбук белән

Яңа уку елына яңа ноутбук белән
Электрон хезмәтләр күрсәтүнең популярлыгын арттыру максатыннан республикада “IT–чемпион” проекты үз эшен дәвам итә. Меңләгән укучы ярдәмендә никадәр урта һәм өлкән яшьтәге кеше компьютерда эшләргә өйрәнеп, кадерле вакытларын янга калдырырга, чиратларда тору кыенлыгыннан котылуга иреште. Узган елгыдан аермалы буларак, конкурс быел ике этаптан тора. Беренче этап майның 25ендә тәмамланды.
Фирүзә Минҗанова Яңа Кишет мәктәбендә белем ала. Ике ел рәттән инде конкурста катнаша. Узган ел туган–тумачаларын, дусларын, танышларын, авылдашларын электрон хезмәт күрсәтүләр порталы аша түләргә өйрәтеп планшет белән бүләкләнгән кыз быел да тырышып хезмәт куйган һәм өченче урынга лаек булган. Тырышлыгы бушка кит-мәгән Фирүзәнең — быел ул ноутбук белән бүләкләнәчәк. Авыл җирендә яшәп тә (гадәттә, андый күләмле проектларда шәһәр балалары җитезрәк була) алдынгылыкка чыгып була икән бит! “Быелгы конкурста без мәктәп-нең барлык укучылары, укытучылар коллективы бердәм булып катнашабыз. Чөнки аерым гына түгел, мәктәбебезне алдынгы итәр өчен дә көч куярга кирәк”, – ди кыз. Чыннан да, быел конкурс шартларында үзгәрешләр бар: анда мәктәп коллективлары да катнаша ала.
Җиңүчеләрне бүләкләрнең дә зурлары көтеп тора: республика буенча беренче өчлеккә кергән мәктәпләр 1 миллион сумлык мобиль сыйныф белән җиһазландырылса, җиңүче укучылар яңа уку елын яңа ноутбук белән каршы алачак.
Аннан тыш, һәр районга 200 мең сумлык интерактив такта кайтартыла һәм аны районның иң яхшы мәктәбенә тапшырачаклар, әнә шуның өчен дә бер–берсе белән көч сынаша белем йортлары.
Мәктәпләргә килгәндә, Фирүзә юкка гына укыган мәктәбе өчен тырышуы турында әйтми, чөнки безнең районнан Яңа Кишет һәм Иске Ашыт мәктәпләре республика күләмендә алдынгы урыннарда бара. Конкурста район буенча укучыларның барысы да катнаша. Мәктәпләрнең берсе дә читтә калмаган. Рай-онда республикакүләм бәйгедә иң күп балл җыючы укучы Илдан Фәйзуллин, ә игезәге Ильяр, аннан чак кына калышып, икенче урынга чыкты. Район мәгариф учреждениеләренең мәгълүматлаштыру буенча җаваплы баш белгече Илшат Фәйзуллин әйтүенчә, укучылар конкурста актив катнаша, чөнки җыелган балларны “IT– чемпион” логотибы төшерелгән футболка, кепка, флешка һ.б. истәлекле бүләкләргә алмаштырырга була һәм балалар бу мөмкинлектән файдаланырга тырыша.
Район халкы арасында электрон хезмәт күрсә-түләр аша түләүләр күптән башкарыла инде. Һәр оешма, шул исәптән безнең редакция коллективы да түләүләрне Интернет аша башкара. Чөнки тиз дә, уңайлы да, картаңда акчаң гына булсын...
Быел конкурска кертелгән яңалыклар һаман арта бара. Бәйгедә майның 19ыннан старт алган авыл җирлекләре катнаша. Аларның хезмәтенә нәтиҗәләр ике этапта: августта һәм декабрьдә ясалачак.
Гөлназ ГЫЙНИАТУЛЛИНА