Кайттыгызмы, якташлар?

Кайттыгызмы, якташлар?
Узган атнада Сабантуйлар авылларны гөрләтте, кешеләрне җырлатты, очраштырды, күрештерде, күңел түрләренә яңа хатирәләр сырлатты.
Лесхоз Сабантуе гүзәл табигать кочагына быел да кунакларын җыйды. Ел да күңеллелеге, программасында нинди дә булса үзенчәлеге белән тирә-юнь халкын үзенә җәлеп итүче Сабантуй быел да үз гадәтенә тугрылыклы калган. Хәтта берничә ай элек кенә дөньяга аваз салган сабыйларны да тамаша күрергә алып килгәннәр. Елмаеп багучы кояш нурларында коенып (берара кара болытлар куерып алды, ләкин яңгыр яварга кыймады), инде ничә еллар Сабантуйлар шаһите булып утыручы мәһабәт наратлар күләгәсендә хәл җыеп бәйрәм итте халык: җыр-бию турында әйтеп тә торасы юк, биредә үзеңнең нәрсәгә сәләтле икәнлегеңне дә күрсәтергә мөмкинлек бар. Менә шундый бәйгеләрдә сынала инде синең җитезлегең, тапкырлыгың, булганлыгың һ.б. Уен–бәйгеләрдә катнашкан һәркем беренче булырга тырышты. Тырышып яулап алган бүләгең киләсе Сабантуйга кадәр якты хатирәләр тулы бәйрәм турында искәртеп торачак бит.
Бәйрәмдә бәйгеләрнең даими тамашачысы, гадәттә, урта һәм өлкән буын вәкилләре. Яшь буынның ихласланып ярыш-ларда катнашуына, үз-ләренең дәвамчылары булуына шатланып күзә-тә алар. Әнә, 5–6 яшьлек малайларның бил алышуы нинди гүзәл күренеш. Киләчәктә Сабантуй батырлары шулар булачак инде.
Ат ярышы. Аның да үз тамашачысы, җан атучылары бар. Кайбер елларда ярышка дистәдән артык ат килсә, быел алты җайдак җитезлеген, көчен сынады. Көч дигәннән, гаярь куәтлеләр гер күтәрүчеләр, бил алышучылар арасында гына түгел икән, ярты центнерлы шикәр комы капчыгын күтәреп 5 мәртәбә әйләнеп чыккан Алга–Көектә туып–үсеп, хәзер Арчада яшәүче Дамир Төхфәтуллинга тиңнәр булмады. Милли көрәштә абсолют батырның бүләге — тәкәгә Лесхоз мәктәбе директоры Зөлфәт Дәү-ләтбаев лаек булды. 20 елдан артык көрәшүче батырның бу ничәнче тәкәсе булды икән?! Район Мәдәният йорты хезмәт-кәрләре, үзешчәннәр, ветераннар, яшьләр, авыл үзешчәннәре Сабантуй кунакларына көне буе бәйрәм рухы бүләк итте. Лесхоз Сабантуен район башлыгы Алмас Назиров та тамаша кылды.
Һәр адымда милли сулыш сизелеп, милли аһәң белән күңелләрне иркә-ләүче бәйрәм ерактагы кардәшләребезне чакырып кайтаруы белән дә кадерле: күптән күрешмәгән дуслар, туганнарны, авылдашларны күрештерүе белән дә бик якын ул. Соңгы елларда Сабантуй көннәрендә генә авыл урамнарын моңлы гармун иңләп уза. Үзенең хуҗасы белән яшьлегендәге гөр-ләп торган авыл тормышын эзли бугай ул...
Сабантуй — ямьле җәйгә керү капкасы. Яңа көчләр туплап, бәйрәмнән рух, киләчәк көнебезгә көч алыйк. Киләсе Сабантуйларда очрашырга язсын, якташлар!
Розалия ЗИННӘТОВА