Үзебезнең атлар көчле

Үзебезнең атлар көчле
Атлар ярышы сәгать 2дә башланып китте. 1 сәгать алдан килсәм дә, ат яратучылар инде ипподром янында иде. Тәмләп сөйләшә-сөйләшә атларны күзәтәләр.
Атлар сабырсызланып, ярыш башланганны көтә.
Микрофон телгә килде. Алып баручы Фәрхәт Зыятов тиздән ярышлар башланачагын, иң беренчеләрдән булып чиста токымлылар керәсен хәбәр итте.
Башланды! Чиста токымлы өч ат алга ыргылды. “АСПК” акционерлык җәмгыятеннән 3 яшьлек “Алтера” атында — Гөлнара Закирова, “Кырлай” агрофирмасы”ннан 7 яшьлек “Эксклюзив” атында — Радик Гарифуллин, “Ак барс” агрокомплексы”ннан 9 яшьлек “Илхан” атында — Адел Габидуллин.
— Тренерлар үзләре чаба, — дип, күзәтте ярышны Биектау ипподромыннан килгән бер төркем җайдаклар. — Эх, берсенең дагасы чыгып очты. “Эксклюзив”, нинди шәп ат, сынатма!
“Ак барс” агрокомплексы” аты финишка беренче, “Кырлай” агрофирмасы”ннан “Эксклюзив” кушаматлы ат — икенче, “АСПК” акционерлык җәмгыяте аты өченче килде. Ярышта катнашкан бердәнбер хатын–кыз Гөлнара Закировага 43 яшь.
Ярышка ярымчиста токымлы дүрт ат керде. Салават Бикбаев аты башта беренче барды, 800 метрлы бер әйләнешне узгач, “старт” тирәсендә Салават атын әтиле–уллы Рамил белән Рәмзил Рәхмәтуллиннарның аргамаклары узып китте.
Финишка Рәмзил Рәхмәтуллин беренче килде, икенче — Рамил Рәхмәтуллин, өченче — Салават Бикбаев. Рәхмәтуллиннар Арчадагы ярышка кадәр Биектау Сабантуе ат ярышында 1нче урынны алганнар иде инде. Икенче көнне Теләчедән шулай ук җиңү белән кайттылар.
Ярымчиста токымлы атлар ярышында стартка 7 ат тезелде.
“Ак барс” агрокомплексы”ның 6 яшьлек аты финишка беренче килде. Җайдагы — Адел Габидуллин, икенче — Яңасаладан Зиннур Гафуров аты (җайдагы Зөлфәт Гафуров), өченче — Яңасаладан Айрат Сафин атында Артем Миронов.
2 яшьлек атлар ярышында Яңасаладан Зиннур Гафуровка Салават Бикбаев җиңү алып килде. Салават үзенең икенче ярышта өченче урынны алган атын читкә куеп торып, Зиннур Гафуров атында чапты. Икенче урында — “Кырлай” агрофирмасы”ннан Рөстәм Зарипов, өченче урында — “Ак барс” агрокомплексы”ннан “Йолдыз” кушаматлы атта Илнур Рамазанов.
Гади эш атлары. Барысы 8 иде. Хәтта Биектаудан да килгән иделәр. Монысында да Зиннур Гафуров атына тиңнәр булмады. Җайдагы — Зөлфәт Гафуров. Икенче — “Кырлай” агрофирмасы” атында Алнур Йосыфҗанов, өченче —“Ак барс” агрокомплексы” ширкәте атында Зөлфәт Рамазанов.
Ярышта катнашкан 26 ат арасында Арчадан әтиле–уллы Рамил белән Рәмзил Рәхмәтуллиннар, Салават Бикбаев, Яңасаладан Айрат Сафин, Зиннур Гафуров, “Ак барс” агрокомплексы” ширкәте, “Кырлай” агрофирмасы” атлары үзләрен иң көчлеләр итеп танытты. Киләсе Сабантуйларга кадәр!