Шаулады, гөрләде мәйдан

Шаулады, гөрләде мәйдан
Икмәк булса, җыр да була, диләр. Милли бәйрәмебез Сабантуйлар нигезендә әнә шул икмәкне үстерүче игенчеләребез хезмәтен олылау ята. Бу хезмәт беркайчан да җиңел булмаган, тубал белән чәчү чәчкән чорларда да, хәзерге югары технологияләр заманында да фидакарь игенчеләребезнең тире белән үстерелгән һәм үстерелә икмәк.
Быелгы Сабантуйларга кадәр дә район кырларында яңа уңыш язмышы өчен киеренке көрәш барды. Механизаторларыбыз катлаулы шартларда да сынатмады, аларның тырыш хезмәте мактауга лаек. Һәр хуҗалыкның сабан батырына район Сабантуенда иң зур хөрмәт күрсәтелде.
Арча Сабантуеның даны еракларга билгеле. Быел Сабантуй мәйданы тагын да матурланган, бизәлгән, күркәмләнгән. Иртәдән дәртле җырлар яңгырый. Мәйданга килүче халыкны фольклор коллективы, милли киемдәге кызлар, егетләр чәкчәк белән каршылый. Рәттән тезелеп киткән татар, рус, керәшен, мари йортлары районыбыздагы төрле милләтләр-нең дус, тату яшәүләрен чагылдыра. Әлеге милләт вәкилләре һәр кергән кешене ипи–тоз, якты йөз белән каршылый, чәен, сыен, милли ризыгын тәкъдим итә.
— Районыбыз игенчеләре быел да зур мәйданнарда чәчү эшләре башкарды, көнне–төнгә ялгап эшләде, орлыклар матур тишелеш бирде, тилмереп яңгыр көтә, — диде муниципаль район башлыгы Алмас Назиров район Сабантуен ачканда ясаган чыгышында. — Барыбыз да Раббыбыздан шифалы яңгырлар сорыйк, хезмәтебез бәрәкәтле булып, исән–сау җыеп алырга, аның игелеген күрергә язсын.
Узган елгы сабан батыры Раил Рәхимов белән Сабантуйның абсолют батыры Радил Шаһисламов 2014 елның Сабантуй флагын күтәрәләр.
Сабантуйның хөрмәтле кунаклары мәйдан уртасына чакырыла. Татарстан Республикасы Хөкүмәте вәкиле, яшьләр эшләре, спорт һәм туризм буенча министр урынбасары Хәлил Шәйхетдинов Татарстан Республикасы Президенты Рөстәм Миңнехановның бәйрәм котлавын җиткерде.
Кунаклар традиция буенча колгага чигүле сөлгеләр бәйләде.
Мәйданга бизәлгән җигүле атлар керә. Искиткеч, күңелләрне җилкендерә торган мизгелләр бу. Атлар санының елдан–ел арта баруы да куандыра. Барысы да тырышкан, бертигез, аерып алып әйтүе дә кыен. Җиңүчеләрне билгеләү жюригә дә ансат булмады. “Ватан” ширкәтеннән Риназ Зәйнуллин, “Арча” ширкәтеннән Таһир Галимуллин, “Татарстан” ширкәтеннән Илшат Юзаев иң яхшылар дип билгеләнде. Башкаларга да ерак юллар үтеп килеп матур мизгелләр бүләк итүләре өчен рәхмәт!
Сабантуй мәйданында иң хөрмәтле, иң мактаулы урын, әлбәттә, сабан батырларына. Үз хуҗалыкларында җиңүчеләр алар. Араларында район батырлары да бар. “Игенче” ширкәтеннән Илнар Ситтиков быелгы язгы кыр эшләрендә югары нәтиҗәләргә ирешеп, беренче урынны яулады. “Северный” ширкәтеннән Рашат Мәхмүтов — икенче, “Татарстан” ширкәтеннән Габделфәрт Зиатдинов өченче урында. Муниципаль район башлыгы Алмас Назиров аларга Мактау дипломнары, акчалата премияләр тапшырды.
Хуҗалыкларда иң яхшы нәтиҗәләргә ирешкән сабан батырлары Рәхмәт хатлары һәм акчалата премияләр белән бүләкләнде.
Мәйданда шулай ук үз һөнәрләренең остасы булган авыл хуҗалыгы белгечләрен, гаилә фермалары башлыкларын, узган елгы уракта югары күрсәткечләргә ирешкән механизаторлар, 2013 елда фидакарьлек күрсәтеп хезмәт иткән терлекчеләр, әле дә тырышып эшләүче ветераннар, хуҗалык җитәкче-ләре, эшмәкәрләрне хөрмәтләде-ләр.
Бөтен районны шаулатып үткән “Газиз Арчам! Даның зурдыр, юлың туры, сиңа багышлана ул–кызларың җыры!” бәйгесендә җиңүчеләр дә бүләк алды.
2014 ел илебездә Мәдәният елы дип игълан ителгән иде. Шушы уңайдан муниципаль район башлыгы Алмас Назиров “Бердәм Россия” партиясенең Татарстан төбәк бүлекчәсе исеменнән җәмәгать тормышында актив катнашканы өчен Хәсәншәех мәдәният йортына (директоры Фирдүс Хамматов) теннис өстәле алу өчен сертификат тапшырды.
Узган елгы Сабантуй белән быелгысы арасында районда 414 пар өйләнешкән, 678 бала туган. Ә менә Гүзәл һәм Илнур Әхмәтгалиевларның кызы Азалия узган елгы Сабантуй көнендә дөньяга килгән. Бу гаиләгә район башлыгы истәлекле бүләк тапшырды.
Ә менә Арча шәһәреннән Фирдания һәм Әдһәм Шәриповлар бергә — 50, Иске Кырлайдан Ханна һәм Минсабир Әкбәровлар 65 ел гомер итәләр! Мондый вакыйгаларны билгеләп үтми мөмкинме! Алар да истәлекле бүләк алды.
Арча шәһәрендә яшәүче 94 яшьлек Маһирәҗәб Абдуллинага район башлыгы матур тормыш һәм хезмәт юллары үткән өчен рәхмәт сүзләре әйтеп бүләк тапшырды.
Сабантуйның йөзек кашы — көрәш! Мәйдан уртасына чыгып көч сынашырга теләүчеләр дә, җанатарлар да әнә күпме! Балалар, яшүсмерләрнең милли көрәшне шулай яратуларын күрү күңелгә рәхәтлек бирә. Киләчәктә менә дигән батырлар чыгар әле алар арасыннан. Үрнәк алырлык өлкән абыйлары янәшәдә генә. Легендар көрәшче Әхәт Закировны биргән Наласа җирлегенең чишмәләре бүген дә саекмый! Кайсы келәмгә карасаң да, ике көрәшченең берсе шушы авылныкы булыр. Югары Мәтәскә Наласа кебек зур авыл булмаса да, көрәшчеләре әнә күпме!
Район Сабантуеның төп батыры кем буласын шактый озак көтәргә туры килде. Күпләр быел Арча шәһәреннән Илнур Зәйнуллин абсолют батыр калачак, дип фараз итте. Моның өчен аңа үзеннән 55 килограммга җиңелрәк булган Күпербаш егете Илшат Идиятовны алып чөяргә генә кирәк иде. Әмма, кечкенә дә, төш кенә дигәндәй, Илшат тимер бәдәнле булып чыкты, белгән кешеләр быел ул элеккегә караганда да әзерлеклерәк, диләр. Якындагы елларда аны җиңүе җиңел булмастыр.
Ильяс ФӘТТАХОВ