Шәхси эшмәкәр буласың килсә

Шәхси эшмәкәр буласың килсә
Мәшгульлек үзәге төрле программалар буенча эш алып бара. Шуларның берсе — “Халыкның үз–үзен эш белән тәэмин итү” программасы. Ул безнең районда ничек тормышка ашырыла? Мәшгульлек үзәге җитәкчесе Гөлфия Низамова белән әңгәмәбез шул хакта.
—Әлеге программа турында тулырак аңлатсагыз иде.
—Эшсез булып, Мәшгульлек үзәгендә исәптә торучыларга кагыла бу. Әлеге программа кысаларында эшсез гражданин үз эшен ачу өчен 117600 сум күләмендә дәүләт ярдәменнән файдалана ала. Акчаны кире кайтарасы булмый. Бу программа буенча субсидияләр саны (суммасы да) сизелерлек кимеде. 2014 елда Арча районында 12 эшсез кеше үз бизнесын ачып җибәрә ала.
—Районда шушы максат белән субсидия сорап мөрәҗәгать итүчеләр күпме?
—9 кеше бизнес–план белән килде. Күптән түгел Мәшгульлек үзәге каршында эшләп килүче эксперт комиссиясенең утырышы булды. Аның составына район башкарма комитеты җитәкчесенең беренче урынбасары Эльмира Хәстиева, Пенсия фонды идарәсенең бүлек җитәкчесе Марат Рәхмәтуллин, салым инспекторы Римма Хисамиева, авыл хуҗалыгы идарәсенең өлкән белгече Илдар Галәветдинов, эшмәкәрләр союзыннан Андрей Егоров, мин һәм үзәкнең баш хисапчысы керә. Шунда һәрберсенең бизнес–планы җентекләп каралды.
—Җентекләп дигәннән, таләпләр нинди?
—Ул эшнең Арча районы өчен икътисадый яктан файдалы булуы шарт. Аннан халыкка хезмәт күрсәтү, салым кертү күләме дә зур роль уйный. Узган елларда бик күп крестьян–фермер хуҗалыклары һәм шәхси предприятиеләр ачылды. Кайберләре көч–хәл белән бер елны үткәреп җибәрде дә, ябылды. Субсидияне ниндидер төпле максат белән түгел, ә кешедән күрмәкче булып алучылар да очрады. Хәзер моңа юл куелмый. Чөнки мәҗбүри шарт—2 ел ябылмыйча эшләү, югыйсә, акчаны кире кайтарып бирергә туры киләчәк. Бу эшсез тилмергән кеше күтәрелеп китсен, үз урынын тапсын өчен күрелгән чара. Шуңа эшне башлаганчы, яхшылап уйлап бетерергә кирәк. Эксперт комиссия-се әгъзалары да бик таләпчән булды. 9 кешедән 4се генә субсидия алырга лаеклы, дигән карарга килдек.
—Күбрәк нинди максат белән субсидия алырга телиләр?
—Беренче чиратта, чәчтараш ачу. Шундый 3 бизнес–план (Арчада, Наласада, Шушмабашта) тыңланды һәм кабул ителде. Эшләре уңар, дип уйлыйбыз. Бина стеналарын алмаз белән бораулау белгечлеге Арчада юк иде әле. Шуңа бу эш белән шөгыльләнергә теләүчене хупладык. Болардан тыш, мебель җыю, крестьян–фермер хуҗалыклары булдыру, йөк ташу буенча да бизнес–планнар тыңланды. Ел ахырына кадәр киләчәккә план корып, безгә мөрәҗәгать итәргә мөмкинлек тагын бар әле.
—Субсидия бирелү тәртибе ничегрәк?
—Яклау тапкан әлеге 4 кеше салым инспекциясендә шәхси эшмәкәр булып теркәлергә тиеш. Аннан алар исәбенә акча күчерелә. Алар акчаның ничек тотылуы турында безгә исәп–хисап биреп барырга тиеш.
Гөлсинә ЗӘКИЕВА