Тырышкан кешегә юл ачык

Тырышкан кешегә юл ачык
Район эшмәкәрләренең чираттагы киңәшмәсе булды. Түгәрәк өстәл рухында узган киңәшмәдә район башкарма комитеты җитәкчесенең беренче урынбасары Эльмира Хәстиева, Арча һәм Әтнә районнары буенча Пенсия фонды идарәсе җитәкчесе урынбасары Гөлназ Ибәтуллина, районара салым инспекциясенең бүлек мөдире Мөнир Шәйдуллин эшмәкәрләргә кагылышлы иминият взнослары, салымнар, төрле түләүләр өлкәсендәге үзгәрешләр турында сөйләде.
Гөлназ Ибәтуллина сүзләренчә, быел шәхси эшмәкәрләргә Пенсия фондына түләнә торган иминият взносларының суммасы кимегән. “Ләкин шунысы бар — шәхси эшмәкәр булып теркәлеп эшчәнлекләрен алып бармаучылар да быел взнос түләргә тиеш. Эшмәкәрләр ел саен Пенсия фондына тиешле түләүләрне башкармаса аларның стажы бармый һәм лаеклы яше җиткәч пенсия дә түләнмәячәк. Шәхси эшмәкәрләргә иминият түләүләре белән pfrrt.ru сайтында танышырга була”, — ди ул. Шулай ук өстәмә финанслау программасы белән дә таныштырды. Узган елдан башлап почта тартмаларында Пенсия фонды идарәсеннән килгән зур конвертлар юкка чыкты. Алар хәзер җибәрелми, ә шәхси счетыңда никадәр сумма җыелганлыгын Арча һәм Әтнә районнары буенча Пенсия фонды идарәсендәге 3нче бүлмәдә, яисә саклык банкына кереп белеп була.
Салымнарга килгәндә, аларны үзвакытында түләү эшмәкәрләрне зур суммадагы штрафлардан һәм башка проблемалардан коткара. Мөнир Шәйдуллин салым инспекциясе сайтында район салым инспекциясеннән алган пароль һәм логин ярдәмендә шәхси кабинет ачып булганлыгы турында әйтте. Күпме бурычың барлыгын шул кабинетка кереп күзәтеп барырга мөмкин. Бу чит илгә чыгучылар өчен уңай ысул, чөнки бурычлыны илдән чыгармыйлар. Кече бизнес белән көн итүче эшмәкәрләр бүгенге көндә квартал саен табышка бердәм салым (ЕНВД), салымнарның гадиләштерелгән системасы (УСН) салымнарын түли. Шәхси эшмәкәрләр иминият түләүләрен, бурычларын ай саен 15еннән дә калдырмыйча түләргә тиеш, юкса, икенче көнне үк пеня санала башлый. Бу хакта канәгатьсезлек белдерүчеләр булды, әйтик, 13е көнне банк аша түләсәләр һәм ул җомга көн булса, ул сумма тиешле җиренә ике–өч көннән генә барып җитә.
“Шундый кыенлыклар килеп чыкмасын өчен Интернет ярдәмендә “Госуслуги” порталы аша түләү уңайлырак булачак”, — дип аңлатты Эльмира Хәстиева. Эшмәкәрләрне проектлар конкурсында катнашырга чакырды.
Киңәшмәнең тагын бер яңалыгы — “Лизинг” компаниясе вәкиле эшмәкәрләргә кулай бәядән берничә елга түләү шарты белән бензин–метан яга торган “ГАЗель” машиналары тәкъдим итте. Бу машиналарны күреп, хәтта йөртеп карау мөмкинлеге дә тудырылганга, эшмәкәрләр үзләрен руль артында да сынап карады. Лизингта катнашу турында төгәл мәгълүматны “Прогресс” эшмәкәрләр союзыннан алырга мөмкин.
Розалия ЗИННӘТОВА