Пөшәңгәрлеләр моңа лаек

Пөшәңгәрлеләр моңа лаек
Пөшәңгәрнең йөзек кашы булган башлангыч мәктәп–балалар бакчасы бар. Төзелүенә инде ничә еллар, ә ул әле генә сафка баскан кебек, яңа килеш тора бирә. Авылның гына түгел, районның да горурлыгы бу бина, әллә кайлардан килгән кунаклар да коллективның матур эшләрен күреп сокланып китә.
— Бу авылда гаять тырыш халык яши, — диде Пөшәңгәрдә мәдәни–спорт үзәген ачу тантанасында муниципаль район башлыгы Алмас Назиров. — Сез мондый ихтирамга лаеклы, гомумән, бәхетле кешеләр сез. Менә медицина пункты да булган мәһабәт үзәк сафка керә. Сездә яңгырлар да башка урыннарга караганда күбрәк яуды, бу яктан да бәхетле сез.
Район башлыгы соңгы өч елда дүрт клуб төзелүен әйтеп үтте, әлеге программаны тормышка ашыруның башында торган республика Президентына, төзүчеләргә рәхмәт сүзләре җиткерде. Республикада гамәлдә булган башка программалар да безнең районда уңышлы тормышка ашырыла.
Алмас Әминович мәдәни–спорт үзәген төзүгә зур өлеш кертүчеләргә Рәхмәт хатлары тапшырды, үзәккә баян бүләк итте.
— Җирлегебез матур вакыйгаларга бай, — диде “Ватан” ширкәте җитәкчесе Мансур Әхмәтов. — Моннан ел ярым элек Апазда фельд-шер–акушерлык пункты ачканда Алмас Әминович, Пөшәңгәрдә клуб төзү турында әйткән идегез, менә ул көн килеп тә җитте! Төзүчеләр Казандагы, Мәскәүдәге кебек сыйфатлы итеп төзиләр хәзер. Авыл халкына шундый бүләк ясаганыгыз өчен зур рәхмәт!
— Мондый бәйрәмдә катнашуыма бик шатмын, — диде Бөтендөнья татар конгрессы башкарма комитеты рәисе Ринат Закиров. — Без бәхетле халык, бәхетле заманда яшибез. Халкыбыз эшли, халкыбыз уңган. Шундый гүзәл бинага сукмак өзелмәсен, ул кешеләргә игелекле хезмәт итсен. Мин сезгә бөтен дөнья карый алырлык “Спутник” антенналы телевизор бүләк итәм.
Республиканың төзелеш һәм архитектура министры урынбасары Алмаз Әх-мәтшин Арча районының күп мәсьәләләр буенча өлгерлек күрсәтүен билгеләп үтте.
— Кайбер районнарда әле клубларның түбәләрен генә ябалар, ә сездә инде ул әзер! — диде ул.
Татарстан Республикасы мәдәният министры урынбасары Гүзәл Нигъмәтуллина әйтүенчә, быел республикада шундый 47 клуб төзелә, Арча районындагысы икенче булып сафка баскан.
Ул үзәккә 100 мең сумлык сертификат тапшырды.
Республиканың сәламәтлек саклау министры урынбасары Ренат Җәләлетдинов котлау сүзләре әйтеп, фельдшер–акушерлык пунк-тына сигез төрле анализ ясый ала торган анализатор җайланмасы тапшырды.
— Хәзер сез анализларны шунда гына бирә алачаксыз, — диде ул.
Хезмәт ветераны Гөлфия Зәйнуллина рәхмәт сү-зендә: “Яңа клуб нур өстенә нур булды”, — дип бәяләде. Шагыйрь якташлары Ри-фат Җамал шигырьләрен сөйләп, китаплар бүләк итте.
Соңыннан район, авыл үзешчәннәре матур концерт куйды.
Ильяс ФӘТТАХОВ