Иң яхшысы—тәмәке тартмау

Иң яхшысы—тәмәке тартмау
2014 елның 1 июнендә тәмәке тарту һәм тәмәке продукциясен сатуны чикләү белән бәйле булган “Тәмәке төтене һәм тәмәке куллану нәтиҗәсе тәэсиреннән гражданнар сәламәтлеген саклау турында”гы 2013 елның 23февралендә кабул ителгән 15 номерлы Федераль законның соңгы аерым положениеләре, шуның белән беррәттән әлеге Федераль закон тулы күләмдә үз көченә керде.
Россия Эчке эшләр министр-лыгының Арча районы буенча полиция җитәкчесе урынбасары Ленар Минһаҗев бу хакта тулырак аңлатма бирә.
— Яңа закон буенча нинди урыннарда тәмәке тарту тыела?
— Белем бирү, мәдәният, спорт, яшьләр эшләре буенча органнар, медицина, тернәк-ләндерү, шифаханә–курорт учреждениеләре территорияләре һәм биналарында; һава, барлык төр шәһәр, шәһәр яны элемтәсе гомуми куллану транспортларында (шул исәптән шәһәр эчендәге һәм шәһәр яны маршрутлары буенча пассажирлар йөртүче транспортларда да), тимер юл вокзалына, автовокзалга, аэропортлар, диңгез, елга портлары, метрополитен станцияләре биналарына керү юлларыннан 15 метрдан да якын арада (урамда), шулай ук метрополитен станцияләрендә, тимер юл, автовокзал, аэропорт, диңгез, елга портлары биналарында; социаль хезмәт күрсәтү, дәүләт власте, җирле үзидарә органнары урнашкан биналарда, эш урыннарында; күпфатирлы йортлар лифтларында һәм гомуми куллану биналарында, балалар мәйданчыкларында, пляжлар территория-ләре чикләрендә, автозаправка станцияләрендә тәмәке тартырга ярамый.
—Быелның 1 июненнән нинди үзгәрешләр кертелде?
—Чикләүләр төрләре тагын да артты. Хәзер җәмәгать туклануы, сәүдә, көнкүреш хезмәте күрсәтү, базар, стационар булмаган сәүдә объектлары; торак, кунакханә, вакытлыча яшәү өчен каралган биналарда; пассажирлар йөртә торган ерак арага йөзүче су транспорты, ерак юлга йөрүче поездларда; шәһәр яны элемтәсе буенча йөргән поездларда бары тик пассажирлар утыру һәм төшү өчен файдаланылган платформаларда да тәмәке тарту тыела.
— Законны бозучыларга нинди чаралар күрелә?
—Федераль закон нигезендә тыелган территорияләр һәм биналарда тәмәке тарткан өчен Россия Федерациясе административ хокук бозулар кодексының 6.24 маддәсе нигезендә 500 сумнан 1500 сумга кадәр штраф карала.
–-1 июньнән соң ярты айдан артык вакыт үтте. Шул арада безнең районда шушы сәбәп белән штрафка тартылучылар булдымы?
—Әйе. Шушы аз гына вакыт эчендә дә 27 кешегә 500әр сум күләмендә штраф салынды инде. Полиция хезмәткәрләре бу мәсьәләне даими контрольдә тота. Штраф түлисең килмәсә, закон тарафыннан тыелган урыннарда тәмәке тартмаска, иң яхшысы—тартуны бөтенләй ташларга кирәк.
Гөлсинә ЗӘКИЕВА