“Шатлыкта”гы шатлыклы көннәр

“Шатлыкта”гы шатлыклы көннәр
Санаулы көннәр тиз үтә. Өч айга сузылган җәйге каникулларның 20 көне сизелмичә узып та китте. Ялларны кем ничек үткәрә? Кайберәүләр лагерьларда рәхәтләнеп ял итә, икенчеләре диңгез буйларын үз итеп, Анапага юл тота, өченчеләре эшкә кереп, азмы–күпме акча юнәтә. Шулай да, җәйге каникуллар турында сүз барганда, без күңелле ялларны күзаллыйбыз.
—Районда төрле чаралар оештырылды. Мәктәп яны лагерьларында 800 бала ял итте, — ди тәрбия эшләре буенча район мәгариф идарәсе җитәкчесе урынбасары Миләүшә Гарифуллина. Малайлар һәм кызлар өчен вожатыйлар кызыклы, мавыктыргыч уеннар, экскурсияләр, кыскасы, төрле күңел ачу чаралары үткәрде. Мәктәп яны лагерьларында балаларны ашату оештырылды, тәм–том белән дә сыйладылар үзләрен. Моннан тыш, 5 гомуми белем бирү мәктәбе базасында хезмәт һәм ял лагерьлары эшләде. Анда 200 бала ял итеп кенә калмады, хезмәт чыныгуы да үтте.
Палаткалар корып ял итү дә районда традициягә әйләнде. Берничә ел дәвамында ул төрле мәктәпләрдә оештырылды һәм аны балалар үз итте. Быел сәләтле балалар өчен “Азимут” палата лагере 1–7 июньдә Носы мәктәбендә эшләде.
“Шатлык” лагере үзенең эшен дәвам итә. Шурабаш мәктәбендә төзекләндерү эшләре бару сәбәпле, быел ул Сеҗе мәктәбе базасында оештырылды. 18 июньдә беренче смена тәмамланды да инде. Анда 90 бала ял итте.
Без “Шатлык” лагерена барганда балалар өйгә кайту кәефе белән йөри иде. “Рәхәт булса да, сагындырды”,—диләр. Аерылышасылары да килми үзләренең. Күренеп тора, бер–берләренә ияләшеп беткәннәр, дөнья кадәр дуслар да тапканнар. Телефон номерлары алышалар. 2 сыйныф укучысы Аделина Шакирова Сеҗедән. Лагерь авылның үзендә булса да, кыз өйгә ашыкмый. “Миңа биредә бик ошады. Күңелле булды. Икенче сменага да килер идем әле”,—ди ул.
—Үзебезнең Сабантуй бик ошады. Вожатыйлар да бик әйбәт булды,—диләр Яңа Кырлайдан Солтан Шиһапов, Акчишмәдән Рәдис Сафин, Сеҗедән Әнвәр Нәгыймов.
Вожатыйлар Арча педагогика көллиятенең югары курс студентлары. 10 кыз, бер егет. Булачак инглиз һәм татар теле укытучылары. Өстәмә вожатый һөнәрен дә үзләштерәләр. Менә хәзер ел буе алган белемнәрен практикада сыныйлар.
—Миңа балалар белән эшләү бик ошады,—ди Гөлфия Хәкимова.—Балалар да бик актив. Төрле чараларда теләп катнашалар.
Балаларның активлыгына лагерь җитәкчесе Рәдинә Ибраһимова да сокланып туя алмый. “Араларында шуның кадәр талантлылары бар, исең китәрлек. Концерт-лар куялар, пародияләр күрсәтәләр, бииләр, җырлыйлар”,—ди.
18 көн эчендә биредә нинди генә чаралар оештырылмаган. Төрле бәйгеләр, очрашулар, түгәрәк өстәл артында сөйләшүләр, музейларга экскурсияләр, бәйрәмнәр, күңел ачу кичәләре һәм башкалар. Балалар “Әкияттә кунакта” да булган, сугышчы–интерна-ционалистлар белән дә очрашкан, “Изгелек эшлә” акциясе дә үткәргән, “Ике йолдыз”, “Дан минуты” концертларында чыгышлар ясаган, күңелле спартакиадаларда көч сынашкан, техник иҗат белән дә шөгыльләнгән.
—Улым Шамилне дус малае белән бирегә лагерьга урнаштырдык. Алар моңарчы да күп лагерьларда ял итте. Әмма “Шатлык”ны аеруча ошаттылар,—ди Эльвира Габдрахманова.
—Юллама бәясе—1756 сум. Көнгә 100 сум да чыкмый. Шуңа ашау–эчү, күңел ачу, экскурсияләр—бар да керә,—ди Сеҗе мәктәбе директоры, “Шатлык” лагере җитәкчесе урынбасары Марс Абдуллин.
—Икенче сменада, 21 июньнән 11 июльгә кадәр, “Шатлык” лагеренда 105 бала ял итәчәк.—14 июльдән 20 июльгә кадәр 100 баланы Яңа Кенәр лицее үзенә чакыра. Быел җәйге каникулларда 1305 бала ял итәчәк.
Шушы көннәрдә Татарстан Республикасының Мәгариф һәм фән министрлыгы юлламасы буенча районнан өч укучы Кара диңгез буена ял итәргә китте.
Гөлсинә ЗӘКИЕВА