Арчалылар Казан Сабантуенда

Арчалылар Казан Сабантуенда
Авылларда, район үзәкләрендә Сабантуйлар гөрләп узды. Чират башкалабызга җитте. Узган шимбәдә Казан халкы, илебезнең төрле төбәкләреннән килгән меңләгән кунаклар даны еракларга таралган милли бәйрәмебез шаһиты булды. Ул шәһәрнең берничә урынында узды. Шуларның берсендә, Тынычлык бистәсе янындагы каенлыкта арчалылар бәйрәм итүчеләрнең күңелен күрде. Арча гына түгел, республиканың башка районнары да биләмәләрен булдырып, үзе бер зур урам барлыкка килгән. Матурлыкның чиге юк. Һәрберсе барлык фантазиясен туплап, искиткеч күркәм күренешләр хасил иткән иде.
—Безнең арчалылар аерылып тора. Чын татар моңы агыла, милли уеннар гөрли, кешеләре күркәм,—диде якташыбыз, театр артисты Азат Зарипов.
Чит ил кунаклары да килеште.
Ул көнне арчалылар биләмәсенә кунаклар күп керде. Аларны милли киемнәрдән чәкчәкләр белән гүзәл кызлар, күпереп пешкән икмәк белән өлкән буын вәкилләре каршы алды.
—Биредә без чын татар кызларын күрдек. Аларның яулык бәйләүләренә кадәр икенче, матур. Гомумән, миңа биредә бик ошады. Соклануымны яшерә, хисләремне белдерергә сүзләр таба алмыйм,—диде Цюрих университеты профессоры Хуго Келлер белән Швейцариядән килгән Эдит Келлер.
Франциянең Прованс–Альпы–Лазурный Берег регионы президенты Мишель Возельга каен себеркеләре, юкә мунчалалары, агач ләгәннәре белән чын татар мунчасы бик ошады.
—Мин Казанда беренче тапкыр. Сабантуй бәйрә-менә туры килүемә сөенеп бетә алмыйм. Чын татар дөньясы бу. Кул эшләре бик ошады. Нинди осталарыгыз бар икән!—диде ул чигелгән Арча читекләрен, түбәтәйләрен күрсәтеп.
Сабантуй кунагы Истамбул шәһәре мэры Кадыйр Топбаш түбәтәй дә киеп карады, Арчадагы Казан арты тарих этнография музее оештырган күргәзмә белән дә кызыксынды, ике саплы пычкы белән утын да кисеп карады. Фикерләре белән кызыксынгач, баш бармагын өскә күтәреп, бер сүз белән: ”Искиткеч!”—диде.
Ә менә Көнбатыш Африка иле Бениннан килеп Казанда белем алучы Агбогба Эсперант Элвиска Ильяс Халитовның йорт хайваннары, кошлары, таяк тартышу уены бик ошады, Расул Багернежад Шаян җитәкчелегендә Ираннан килгән кунакларны татар җырлары, моңнары, киемнәре сокландырды.
—Бездә дә татар автономиясе бар. Сабантуйлар, башка төрле милли бәйрәмнәр оештырыла. Әмма минем татар илендә Сабантуй бәйрәмен күрәсем килде. Арчалылар биләмәсе бик ошады. Чын татар тормышы тасвирланган бит монда,—диде Омскидагы татар яшьләре төркеме җитәкчесе Чулпан Фәхретдинова.
Бу көнне арчалылар үзләре генә дә тулы бер бәйрәм оештырды. Үзеш-чәннәребез көне буе сәхнәдән төшмәде. Якташыбыз, Татарстанның халык артисты Рөстәм Закиров та яраткан җырларын бүләк итте. Төрле уеннар, биюләр оештырылды. Чыннан да, безнекеләр оештыра белә. Гадилек тә, зәвыкъ та, матурлык та бар иде анда. Татарстан Республикасының авыл хуҗалыгы һәм азык–төлек министры Марат Әхмәтов, Россия Федера-циясенең Дәүләт Думасы депутаты Айрат Хәйруллин, Казан Федераль университеты ректоры Илшат Гафуров та арчалылар хезмәтен югары бәяләп, бу хакта район башлыгы Алмас Назировка җиткерделәр.
Гөлсинә ЗӘКИЕВА