Тагын өч Йолдыз кабынды

Тагын өч Йолдыз кабынды
Район хакимияте каршындагы бакчада Йолдызлар аллеясына тантаналы шартларда яңа исемнәр өстәлде. Алар: быел 11нче сыйныфны уңышлы тәмамлаган, өч ел рәттән район, республика, Россия күләмендәге ярышларда, олимпиадаларда җиңү яулаган Арчаның 1нче мәктәбеннән Булат Вәлиев, Лесхоз мәктәбеннән Илназ Шәяхмәтов һәм Марат Зәйнуллин. Тантанада район мәгариф идарәсе җитәкчесе Руслан Низамов катнашты.
— Минем белүемчә, Йолдызлар аллеясы башка районнарда юк, — дип сөйләде тантанада район мәгариф идарәсе җи-тәкчесе Руслан Низамов. — Аллеяда барысы 12 Йолдыз яна. Бүген тагын 3әү кабыначак. Безнең Йолдызлар үзләренең тырышлыгы, сәләтләре белән район тарихында тирән эз калдыра. Алга таба да укытучылар биргән белемнәрне тагын да баетып, уңышларга ирешеп, мәктәп, район данын лаеклы якларга язсын!
12 Йолдыз. Язмышларын бе-ләсе килә. 2010 елда Түбән Мәтәскә мәктәбеннән исеме Йолдызлар аллеясында урын алган Динә Шәкүрованың “Ватаным Татарстан” газетасында эшләгәнен беләбез. Хәлен белеп шалтыратам.
—Университетта көндезге бүлектә журналистлыкка укыйм, —диде ул. —Быел 4нче курсны тәмамладым. “Ватаным Татарстан” газетасының хәбәрләр бүлегендә эшлим. Укыйм да, эшлим дә. 5кә генә укыйм. Кызыл диплом белән тәмамлармын, дип уйлыйм. Башта “Ватаным Татарстан” газетасында практика үттем. Газета мөхәррире Назыйм абый эшкә үзе чакырып алды.
Арча Йолдызларының шулай юл яруы укытучылары, мәктәбе, район өчен, әлбәттә, сөенечле хәл. Димәк, аларның исемнәре лаеклы рәвештә Йолдызлар аллеясына урнаштырылган.
— Районда нинди сәләтле яшьләр үсә! Сезнең өчен горурлык хисләре кичерәм, — дип сөйләде 1нче мәктәп җитәкчесе Эльмира Сафина. — Бу укытучыларның зур хезмәте. Хөрмәтле әти–әниләр, әйбәт балалар тәрбияләп үстергәнегез өчен сезгә бик зур рәхмәт.
Лесхоз мәктәбе директоры Зөлфәт Дәүләтбаев балаларга, аларның әти–әниләренә, укытучыларга рәхмәт юллады һәм яшьләргә мәктәптә алган белемнәрен алга таба да файдага куллана алуларын теләде.
Йолдыз исеменә сертификат алган яшьләр үзләренә зур бәя биргәннәре өчен укытучыларына, мәктәп, район җитәкчелегенә һәм әти–әниләренә зур рәхмәт әйтте һәм ышанычны акларга сүз бирде.
Йолдызларның әти-әниләре дә биредә иде.
— Бик дулкынланам, хәтта елыйсы килә, — ди Лесхоз мәктәбеннән Илназ Шәяхмәтовның әнисе Һиндия ханым. — Олысы Шамил Петербургта университетны тәмамлап, шунда эшли. Менә хәзер Илназның экология буенча Петербург, Мәскәү уку йортларына керергә сертификаты бар. Илназны еракка җибәрәсе килми, Казанда калыр, дип уйлап торабыз.
— Бердәм дәүләт имтиханнары килеп җитте. Ә безнең Марат майда Мәскәүгә экология бәйгесенә чыгып китте һәм җиңеп, Мәскәү, Петербург югары уку йортларына сертификат белән кайтты, — дип сөйли әтисе Айдар Зәйнуллин.
— Булат кечкенәдән мөстәкыйль булып үсте, — ди әнисе Лилия Вәлиева. — Спортны бик ярата. Футбол, җиңел атлетика — район, республика күләмендәге җиңүләре күп. Тырыш бала.
...Йолдызлар аллеясында тагын өч Йолдыз кабынды. Шарлар күккә очты. Җыр, музыка. Кул чабулар, котлаулар, истәлеккә бергәләп фотога төшүләр — күңелле! Яшьләрне котларга “Бердәм Россия” сәяси партиясе җирле бүлекчәсенең “Яшь гвардия”челәре дә килгән иде. Уңышлар сезгә, Йолдызлар!
Румия НАДРШИНА