30 яшен яңа бинада

30 яшен яңа бинада
30 еллык юбилеена Урта Курса мәктәбе зур бүләккә ия булды — ныклап төзекләндерү мәктәпне өр–яңа итте. Мәктәпләрне төзекләндерү буенча дәүләт программасы нигезендә районыбызда ел саен берничә белем йорты яңарыш кичерә. Быел Урта Курса, Шурабаш, Түбән Мәтәскә, Арчаның 7нче мәктәпләрен төзекләндерү планга кертелгән иде.
Әле уку елы башланырга ике айдан артык вакыт булса да, Урта Курса мәктәбе укучыларын бүген үк кабул итәргә әзер.
Ачылу тантанасына килгән район башлыгы Алмас Назиров белем йортын яңартуга көче кергән һәркемгә олы рәхмәт сүзен җиткерде. “Мәктәп балалар белән шыгрым тулы булып, укытучыларны эшкә тартып торсын, укучылар тирән белем алып, районыбызның, республиканың данын еракларга таратырга язсын”, — дигән теләкләр белән заманча такталар алу өчен 60 мең сумлык сертификат бүләк итте.
ТР мәгариф һәм фән министры Энгель Фәттаховның да бүләге заманча мәктәп өчен иң кирәкле — ул интерактив тактага сертификат тапшырды. Фикерләре, теләкләре — бүләкләрнең иң зурысы. “Арчада мәктәпләргә үзгә караш. Төзекләндерүне тиз арада, сыйфатлы итеп башкарып чыгуыгызны бүген республикага үрнәк итеп күрсәтәсем килә, — диде ул. — Республиканың киләчәге мәгариф кулында, ди Президентыбыз. Шуны һәрчак истә тотып, без үз эшләрен профессиональ дәрәҗәдә белгән, тормышның төрле мизгелләрендә дә югалып калмый торган балалар тәр- бияләп чыгарырга тиешбез”.
Әлбәттә, укучылар моны яхшы аңлый, аларның да республика, район, авыл җитәкчеләренә, укытучыларга, иганәчеләргә яңа уку елына шундый бүләк ясаганнары өчен рәхмәтләре зур. Алай гынамы, инде дистә еллар лаеклы ялда булучы укытучыларның да хисләре ташый. “Биредәге яңа технологияләр, укыту җиһазлары белән танышкач, мәктәбебез заманадан калышмый икән, дип бик куандым”, — ди Сөембикә Хисамиева. 33 ел стажлы Нурсанә Гыйбадуллинага ачылган көненнән башлап, бүгенге заманча мәктәптә белем бирү бәхете дә елмайган. Мәктәптәге 13 укытучы арасында тәҗрибәлеләренең берсе ул.
Директор Фәнил Хәбибуллин әйтүенчә, төзекләндерү эшенә февраль аенда тотынганнар һәм шушы кыска арада башкарып чыгарга өлгергәннәр.
Розалия ЗИННӘТОВА