Яңалыклар

30 ИЮНЬДӘ ИРТӘНГЕ КИҢӘШМӘДӘ урып-җыю эшләренә, ягу сезонына әзерлек, фермаларны, сенаж траншеяларын төзекләндерү эшләре турында сөйләшенде. Бюджет үтәлеше, салымнарны вакытында җыю, коммуналь чыгымнарга анализ ясау мәсьәләләре каралды. Шәһәр, авыл эчләрен, юл кырыйларын тәртипкә китерү, чүпләрдән чистарту, юлларны тигезләү, төзекләндерү эшләрен төгәлләү бурыч итеп куелды.
Киңәшмәне район башлыгы А.Ә.Назиров алып барды.

1 ИЮЛЬГӘ РАЙОН ХУҖАЛЫКЛАРЫНДА бер шартлы терлеккә 5,32 центнер азык берәмлеге әзерләнде. “Курса МТСы”нда — 11,5, “Ак барс” агрокомплексы”нда — 9,3, “Кырлай”да 9 центнер.
“Сафиуллин”, “Шиһабеддинов”, “Арча” ширкәтләрендә 0,7–1,7 центнер азык берәмлеге генә азык бар.
“Ак барс” агрокомплексы”нда 9200 тонна сенаж салынды.
Яшь терлекләр өчен 341 тонна витаминлы печән әзерләнде.

1 июльдән 2015 елның беренче яртыеллыгына “Арча хәбәрләре” газетасына 2014 елның икенче яртыеллыгындагы бәяләр белән вакытыннан алда язылу башланды. Аерым кешеләр өчен язылу бәясе — 438, хезмәт коллективлары өчен 480 сум. Газетага почта бүлекчәләрендә языла аласыз.

Пенсия фонды сезне көтә
Республиканың Пенсия фонды бүлеге җитәкчесе урынбасары Эдуард Яфасович Арчада Пенсия фонды идарәсендә пенсия мәсьәләләре буенча гражданнарны кабул итә.
Кабул итү 24 июльдә көндезге сәгать 11дән 13 сәгатькә кадәр үткәрелә. Адрес: Арча, Комсомол урамы, 4нче йорт.
18 июльгә кадәр (84366) 3–04–78 телефоны аша алдан язылуыгыз сорала.

Салават ат ярышында җиңеп кайтты
Район башлыгы Алмас Назиров җитәкчелегендә Арча районы делегациясе Киров өлкәсенең Нократ Аланына Сабантуйга барды. Мөселман кардәшләребез арчалыларның жырлы–биюле чыгышларын, милли ризыкларын бик яратып кабул итте. Арча егете Салават Бикбаев, үз атында ярышта катнашып, җиңеп кайтты!

Чаңгычылар җәен дә тик тормый
Чаңгычылар җәй айларында да тик тормый. Диләрә Фассалова (1нче мәктәп), Лилия Рәхмәтуллина (Түбән Мәтәскә мәктәбе), Фәнүзә Сәлахова (Урта Курса мәктәбе) биатлон буенча республиканың җыелма командасы составында Удмуртиянең Ижевск шәһәрендә әзерлек үтеп кайттылар. Алар 2014–2015 еллардагы кышкы чорда Россия күләмендә биатлон буенча Татарстан данын яклаячак.

Дипломант булып кайттылар
Казанда “Кубок пятерых” дигән Халык-ара фестиваль–бәйге булды. Арча сәнгать мәктәбе укучылары Ирек Надыршин (укытучысы Альмира Фәхретдинова), Салават Шакиров (Миләүшә Алеева) “Классик гитара. Аерым башкару” номинациясендә дипломант булдылар.

Орнашбашта ике буын очрашуы
Орнашбаш башлангыч мәктәбе балалар бакчасы белән бер түбә астында урнашкан. Киңәшләшеп эшлиләр, бергә чаралар оештыралар. Биредә авылда яшәгән сугыш чоры балалары белән очрашу булды. Өлкәннәр сугыш чорында күргәннәре турында сөйләсә, балалар аларны җыр, биюләре белән сөендерде.