Авыр да, җаваплы да

Авыр да, җаваплы да
Һәр яңа җитәкче халык күңелендә кызыксыну уята. Кем ул? Каян килгән? Ниндирәк кеше? Озак еллар Россия Эчке эшләр министрлыгының Арча районы буенча бүлеге ЮХИДИ бүлекчәсен җитәкләгән Габделхак Касыймов ялга киткәч, аның урынына килгән яңа җитәкче билгеләнде. 20 елга якын Арча ЮХИДИ бүлекчәсендә эшләгән Илдар Нотфуллинны күпләр беләдер дә. Аеруча транспорт белән идарә итүчеләр. Чөнки соңгы вакытта ул районара теркәү–имтихан бүлекчәсен җитәкләде. 3 июльдә булачак һөнәри бәйрәмнәре уңаеннан райондашларны Арча ЮХИДИ бүлекчәсенең яңа җитәкчесе белән якыннанрак таныштырып китәргә булдык.
Әти–әнисе тумышлары белән Түбән Мәтәскәдән. Арчада яшиләр. Ә менә Илдар Нотфуллинның туган җире Кизил шәһәре. 1971 елны әтисе шунда шахтада эшләгәндә туа ул. Аннан гаилә туган якларына кайтып урнаша, Арчада төпләнә. Илдар Арча малае, егете булып үсә. Кечкенәдән урамда күргән саен милиционерларның киемнәренә кызыга торган була ул. Мәктәпне тәмамлаганнан соң шул юнәлештән китәргә батырчылыгы җитми. Югары уку йортына кереп булмас, дип уйлый. Документларын авыл хуҗалыгы институтына илтеп тапшыра. Механика бүлеген уңышлы гына тәмамлап, әтисе Рәшит абый балта остасы булып эшләгән “Сельхозтехника”га инженер–механик булып урнаша.
—Бервакыт ЮХИДИнең Арча бүлекчәсендә эш-ләгән туганым Наил Галимуллин юл хәрәкәте куркынычсызлыгы фондын җи-тәкләргә тәкъдим итте,—ди Илдар Нотфуллин.— Габделхак Касыймов та минем кандидатураны яклады. Риза булдым. Ни дисәң дә, балачак хыялы бит. Биредә юл хәрәкәте кагыйдәләрен пропагандалау буенча балалар белән төрле чаралар оештырдым. Аннан Яр Чаллыда укыту үзәгендә ярты ел белем алып, ниһаять, балачакта кызыккан милиция формасын кидем. Башта юл–патруль хезмәтен башкардым, аннан пропаганда буенча инспектор булдым.
2007 елда аны Әтнә районы ЮХИДИ бүлекчәсе җитәкчесе итеп куялар. Бүлекчә бер ел да ике ай эчендә республикада өченче категория буенча (кечерәк районнар арасында) беренче урынга чыга. Озакламый Илдар Нотфуллинны яңадан Арчага кайтаралар. Бу юлы инде районара теркәү–имтихан бүлеге җитәкчесе буларак. Җиде районнан 17 уку оешмасы (учили-ще, мәктәпләрдәге балалар–яшүсмерләр автомәктәпләре), ДОСААФ оешмалары белән эш итә.
Быелның 28 февраленнән ул ЮХИДИнең Арча бүлекчәсен җитәкли.
—Бүлек җитәкчесе булганда имтихан тапшырган һәр транспорт белән идарә итүче өчен җаваплы булсаң, монда инде юлларның төзеклеге, балалар, машина белән идарә итүчеләр белән эш һәм башкалар турында да онытмаска кирәк,—ди Илдар Нотфуллин.—Юл хәрәкәте кагыйдәләрен бозучы- лар саны арта, штраф түләтүләр авырая. Юл-ларда тәртип урнаштыру безнең көндәлек хезмәт кенә түгел, киләчәккә төп план да. Яшьләр белән эшләүгә игътибарны арттырырга кирәк. Светофор кую алгы планда тора. Кенәр чатына светофор урнаштырылуның файдасын тойдык, юл–транспорт һәла-кәтләре саны сизелерлек кимеде. Хәзер Көнбатыш бистәсенә, Күпербаш чатына светофор кую буенча эш алып барабыз. Юллар начар. Бу юнәлештә дә күп эшләргә кирәк. Хакимият каршындагы юл хәрәкәте куркынычсызлыгы комиссиясе утырышларында барысы да исәпкә алына һәм уртак карарга киленә.
ЮХИДИ хезмәткәрләренең хезмәте авыр да, җаваплы да. Вакыт белән исәпләшә торган түгел, җи-тәкчесенең бигрәк тә. Ял да сирәк эләгә, эштән дә вакытында кайтылмый. Әмма хатыны Гүзәл моңа күнеккән инде. Ирен аңлый һәм барына да түзә. Уллары Айдар белән Адель—аның ярдәмчеләре.
—ЮХИДИнең Арча бүлекчәсе хезмәткәрләре һәрчак юлда. Өйдә сине аңлап, көтеп алучылар булганда күңел тыныч. Юл хәрәкәте сагында торучыларның барысын да һөнәри бәй-рәмнәре белән котлап, эшләрендә уңышлар, иминлек, хатыннарына сабырлык телим,—ди Илдар Нотфуллин.
Гөлсинә ЗӘКИЕВА