Питомникта бәйрәм

Питомникта бәйрәм
“Урын кешене түгел, кеше урынны бизи”,—дип юкка гына әйтмиләр. Арча питомнигы клубына Нәсимә Гарифуллина килгәннән соң мәдәният учагы гына түгел, шәһәрнең питомник өлеше дә җанланып киткәндәй булды. Төрле чаралар үткәрелә башлады, урамнарга гармун моңы, җыр авазы таралды. Узган җомгада биредә бәйрәм оештырылды.
Табигатьнең иң матур урынында, киң болыннар, шау агачлар, бормаланып аккан Казансу елгасы кочагында урнашкан питомник халкы ул көнне гөрләтеп ял итте. Бәйрәмне Нәсимә Гарифуллина белән бергә бирегә килгән “Яшь йөрәкләр” ветераннар ансамбле “Арча җыры” белән башлап җибәрде.
—Питомник—Арча шәһәренең аерылгысыз бер өлеше. Ул үзенең мактаулы җитәкчеләре, тырыш хезмәтчәннәре белән данлыклы. РСФСРның атказанган агрономы Хөснулла Хәйруллин, Әнәс Ибәтуллин, Мәгъсүм Габделхаков, Самат Мамаделеев кебекләр күтәрде дә инде аның данын. Әнәс абый белән Самат абый бүгенге бәйрәмнең хөрмәтле кунаклары да,—диде Арча шәһәре башкарма комитеты җитәкчесе Рафил Исмәгыйлев һәм әлеге чараны оештырган Нәсимә Гарифуллинага, ярдәм кулы сузган депутат Альберт Хәкимовка, Арча шәһәр Советы рәисе урынбасары Римма Мамаделеевага, иганәчеләргә һәм авыл халкына рәхмәт сүзләре җиткерде.
Аннан “дилбегәне” кулына Ибраһим Сабиров алды. Кызыклы шигырьләр, шаярулар белән үзешчәннәрне бер–бер артлы мәйданга чакырды. Питомник халкын сюрприз да көткән икән. Махсус бәйрәмгә кайткан якташыбыз, Татарстанның халык артисты Фердинанд Фәтхи яраткан җырларын ирештерде, мәйдан уртасына чакырып, тамашачылар белән бергәләп биеде. Татарстанның җыр һәм бию ансамбле биючесе, Татарстанның атказанган артисты Григорий Сергеевның дәртле бию-ләре дә күңелләрне күтәрде.
Бәйрәм булгач, аның тырыш, булган кешеләрен дә билгеләп үтүне кирәк санаган Нәсимә Гарифуллина. Моның өчен алдан ук йорттан йортка йөреп иң төзек, матур, хуҗаларның тырыш хезмәте нәтиҗәсендә яшеллек эчендә утырган йортларны сайлап алган, өлкәннәр, яшь гаиләләр, юбилярлар белән очрашкан. Ишегалларын, территорияләрен чиста, пөхтә тоткан, яшеллеккә күмгән, тәрәзә төпләре шау чәчәктә утырган йорт ияләренә бүләкләр әзерләргә дә онытмаганнар. Нурия һәм Әнәс Әхмәтгәрәевлар, Эльза һәм Камил Исламовлар, Гөлшәмия һәм Фоат Хәбибуллиннарга бүләкләр тапшырылды. Моннан тыш, 54 ел тигез гомер иткән Ләбибә һәм Рәфикъ Гыйльметдиновлар, питомникның иң өлкән кешесе Роза Шакирова, 2014 елда игезәк балалары туган Лилия һәм Илдар Шәйхетдиновлар, шулай ук быел әти–әни булган Альбина белән Альфред Галимовлар, Ирина Павлова, Надежда һәм Эдуард Прокофьевларны да бүләкләр белән билгеләп үттеләр, балаларын исән–имин үстерүләрен теләделәр.
Бәйрәм җыр, бию, уеннар белән дәвам итте. Капчык киеп тә, кашыкка йомырка салып та, узышка да йөгерделәр, чүлмәк тә ваттылар, таяк та тартыштылар... Кыскасы, уйнап–көлеп яшәргә күнеккәннәр ул көнне рәхәтләнеп ял итте, аларны бернинди җил дә, яңгыр да куркытмады. Җиңүчеләр бүләксез дә калмады. Тәм–том сатып алу өчен кибетләр эшләде, шашлыгы, казанда пылавы пешеп торды, балалар өчен төрле кызыктыргыч уеннар да бар иде. Уйнап башланган эш әнә шулай зур бәйрәмгә әверелде. Чөнки Нәсимә Гарифуллина аңа бөтен күңелен биргән. Хәтта тынгысыз җан булуына күнеккән ире Наил, уллары да ярдәмгә килгән. Халыкның сөенечле йөзен күрү Нәсимә өчен үзе зур куаныч.
Гөлсинә ЗИННӘТОВА