95нче җәе

95нче җәе
Җәйнең иң матур, Җир–ананың шифалы байлыкларын өләшә башлаган вакытында —июльнең тәүге көнендә дөньяга килә Миңлегөл апа. 95 яшьлек гомер бәйрәме белән котларга килгән район социаль яклау идарәсе җитәкчесе Илдус Әһлиев, район ветераннар советы рәисе Альберт Җамалиев, Кәче авыл җирлеге башлыгы Тәлгать Закировны күргәч, үзенә карата хөрмәт, ихтирамнан күңеле тулып китте аның.
Адәм баласының яшьлеге эш, гаиләдәге мең мәшәкать белән узса, карт-лыгына ул үзенә җимеш — үзен багучылар, догачылар әзерли. Картлык көне бәхетле узганнар иң бәхетлеләрдер сыман. Кәчедәге гомер иткән йортында кунакларны каршы алганда газизләре — балалары барлыгына, үзенә карата мөгамәләгә ихластан горурланды ана.
Биш кыз әнисе Миңлегөл Мөхетдинова бүген балаларының һәр гаилә әгъзасына хәер–догасын ирештереп, Аллаһы Тәгаләгә ялварып яши. Кунакларны да, якыннарын күргәндәй куанып, “Сугышлар гына чыга күрмәсен, без күргәннәрне сезгә күрергә язмасын”, — дип каршы алды.
Бу теләкләрен шул афәтне үзе күргәнгә, авырлыгы үзәгенә үткәнгә әйтә ул. Чөнки сугыш башланганда 22 яшен дә тутырып өлгермәгән кызга фронт өчен, Җиңү көнен якынайту өчен ниләр генә эшләргә туры килми!..
Сугыш башланган елны ук Миңлегөлгә ир–ат тарта торган йөккә җигелергә туры килә. Тәтешкә урман кисәргә, аннан окоп казу эшләренә беренчеләрдән булып колхозның тырыш кызы Миңлегөлне җибә-рәләр. Хәтере яшьлек чорындагы һәр мизгелне саклый. Андый еллар онытылырлыкмы соң?! Яу кырындамени. Киров өлкәсенең Воткин районына урман эшенә киткән кызга өенә кайтып якыннары белән күрешү берничә елдан соң, сугыш беткәч кенә насыйп була. Аларның хезмәте вагонга агач төяү дип берничә сүз белән генә әйтелсә дә, аңа урманда агачларны бер рәвештә кисеп, тимер юл читенә чыгарып өю, үзеңә бирелгән нормаң тулгач кына аны мең газаплар белән төяү керә. Монда эшләүчеләргә Бөек Җиңү килгәнен бер ай узгач кына әйтеп, кайтарып җибәрәләр. Нократ Аланыннан товар поездының тышкы ягында басарга урын табып, көч–хәл белән тотынып, шактый юл кайтырга туры килә Миңлегөл апага. Абыйсы сугыш беткәч тә кайткан, ә әти–әнисе кызны исән түгел дип уйлап, кайгыга баткан.
Авыр еллар булуга карамас-тан, 7 сыйныф уку эләгә аңа. Белем алуның гомер иткәндә никадәр мөһим булуын аңлаган ана балаларына да югары белем алуда юл күрсәтә. Кызларның кайсы табибә, кайсы укытучы, кайсы исәп–хисап эшен үзләштергән. Балаларда әтиләренең зыялылыгы да үз урынын алган. Сугышның башыннан ахырына кадәр көрәшеп ут эченнән исән–сау кайткан, авылдашлары тарафыннан колхоз рәисе итеп сайлап куелган Сәлах абый авылны торгызуда үз–үзен аямый эшли. Фани дөньяны калдырып киткән Сәлахыннан башка Миңлегөл апа 29 елын ялгыз канат булып яши.