Икесе дә бик кирәк

Икесе дә бик кирәк
3 июльдә ТР Дәүләт Советы Рәисе урынбасары Римма Ратникова һәм ТР икътисад министры Мидхәт Шаһиәхмәтов матбугат конференциясе үткәрделәр. Алар быел ТР Икътисад министрлыгы уздыра торган муниципаль районнарның (шәһәр округларының) халык социаль проектлары конкурсы турында сөйләделәр.
Май ахырында “Бердәм Россия” партиясенең Татарстан региональ оешмасы политсоветы социаль мәсьәләләрне хәл итү буенча урыннардан килә торган халык проектларына булышу һәм аларны гражданнарның актив катнашында тормышка ашыру өчен шартлар тудыру турында инициатива белән чыккан иде.
— Марттан башлап май ае буенча Татарстанда күпләргә билгеле партия проекты “Бердәм Россия көннәре” үтте. Акция барышында шәһәрләрдә һәм районнарда кешеләр безнең республикада тормышны ничек яхшыртып булуы турындагы тәкъдимнәр белән килделәр, алар арасында шактый финанс кертемнәре таләп итә торганнары да бар иде. Без әлеге теләкләрне, мөмкинлеккә карап нинди дә булса социаль программага кертергә дип, үзебезнең Хөкүмәткә тапшырдык, — диде Римма Ратникова.
Әлеге башлангыч яклау тапты. ТР Министрлар Кабинеты 16 июньдә тиешле карар кабул итте. Муниципалитетларның иң яхшы социаль проектлары республика бюджетыннан финанс ярдәме алачак. Һәр район икешәр иң мөһим социаль проект сайлап алып, конкурс комиссиясенә тәкъдим итәргә тиеш.
— Безнең районнан “Казансу” халык пляжы һәм “Арча үзәк район хастаханәсенең беренчел муниципальара кан тамырлары үзәге базасында психолог–логопед кабинетын төзү” проектлары тәкъдим ителде, — ди район башкарма комитеты җитәкчесенең беренче урынбасары Эльмира Хәстиева. Икесе дә халык өчен бик кирәкле, мөһим проектлар.
Районда җәйге айларда рәхәтләнеп ял итү, су коену урыны кирәк. Бу турыда сөйләшүләр күп булды, әмма проблема һаман да хәл ителмәгән килеш. Теләсә кайда су коену хәтәр. Узган ел республикада 136 кеше батып үлгән, шуларның 9ы –– балалар. Быел да күңелсез хәбәрләр килгәләп тора. Болар бар да җиһазландырылмаган урыннарда килеп чыккан.
Көтек авылы янындагы буа — күпләрнең яраткан урыны. Урманнан агып чыккан чиста су, искиткеч матур табигать. Проект менә шунда пляж зонасы булдыруны күздә тота. Әлеге зона территориясе, буа төбе чистартылачак, яр буена, сулык төбенә ком җәеләчәк, коену урыннары калкавычлар белән әйләндереп алыначак. Пляж кече архитектура формалары һәм санитария–гигиена әһәмиятендәге биналар белән җиһазландырылачак.
Проектның икенчесенең мөһимлеген озаклап аңлатып торасы да юк. Арча үзәк хастаханәсендә 2009 елда ачылган үзәк 6 районга хезмәт күрсәтә. Өч елда 1610 кеше сәламәтләндерелгән. Инсульт кичергән кешеләрнең тормышын саклап калу буенча алга китеш зур, әмма аларны тулы канлы тормышка кайтару өчен сөйләмне торгызу мөһим. Бу юнәлештә яңа технологияләр киң кулланыла. Психолог–логопед кабинеты булдыру аларны тагын да нәтиҗәлерәк итәчәк.
Газетабыз басмага әзерләнгән вакытта (8 июльдә) Казанда әлеге проектларны яклау узды. Конкурсның финалы —15 июльдә.
Ильяс
СӘХӘПОВ