Детектив фильмнардагыча

Детектив фильмнардагыча
1 июльдә булды бу хәл. ЮХИДИ идарәсе Арча бүлекчәсенең 3 экипажына ике сәгать буе (кичке 6дан 8гә кадәр) “ВАЗ–2114” машинасы артыннан куып йөрергә туры килде.
Олы Әтнәдән Арча ягына таба кызу тизлек белән барган машинаны туктата алмагач, күрше районның ЮХИДИ бүлекчәсе инспекторлары Россия Эчке эшләр министрлыгының Арча районы буенча эчке эшләр бүлегенә хәбәр итә. Арчалылар шунда ук юлга чыгып, әлеге машинаны каршы ала, тик тегесе аларны да санларга теләми, хәтта бәрдереп китә яза. Аннан Арча шәһәре эченә кереп ярты сәгатькә юкка чыга. Юл иминлеге сакчылары үзен сагалап торалардыр дип башына да китерми. Аңышкач, сәгатенә 180 километр тизлек белән Казан ягына элдертә. Берничә тапкыр тиешсез урында каршы як полосага чыгып, авария хәле тудыра. Монда да ЮХИДИ хезмәткәрләренең үзеннән калышмавын күреп, Чулпан авылыннан кире Арчага борыла, шәһәр урамнарын кызу тизлек белән үтеп, Үрнәккә юнәлә, өч Пошалымны әйләнеп чыга. Аннан басу, полосалар аша Балтач ягына китә, туктарга кушкан күрше район полиция хезмәткәрләрен дә санларга теләми. Тик барыбер качып котыла алмый, басуда үзен кысрыклап алган ЮХИДИ хезмәткәрләре машинасын бәрдереп туктый. Шунда транспорт белән идарә итүче 1991 елгы Үрнәк бистәсе егетенең исерек булуы ачыклана.
Тиз йөрергә, куыш–куыш уйнарга яратуы аңа хәзер бик кыйммәткә төшәчәк. Исерек килеш руль артына утырган өчен ел ярым–ике елга кадәр машина йөртү хокукы биргән таныклыгыннан колак кага, шуңа өстәп 30 мең сум штраф түли. Тиешсез урында узарга чыккан өчен (быел бер тоткарланган булган инде) тагын бер ел таныклыксыз калып, руль артына утыра алмый, юл иминлеге сакчыларына буйсынмаган өчен мировой суд тарафыннан 2 тәүлеккә ирегеннән мәхрүм ителә. Шул ук вакытта автостоянкадагы машинасы да аның “файдасына” акча чутлый.
2 июль көнне Арчада тагын исерек килеш руль артына утырып юлга чыккан ике очрак теркәлде. Шуларның берсе юл һәлакәте белән тәмамланды. Исерек хәлдә “Фиат” машинасы белән идарә итүче ТАССРның 90 еллыгы урамыннан төп юлга чыга һәм Балтач юлыннан килүче машинага бәрелә. Бәхеткә, кешеләргә зыян килми.
3 июльдә Яңа Кенәр юлында (Бирәзәбаш авылына борыла торган юл тирәсендә) ЮХИДИ хезмәткәр-ләре кармагына тагын бер спиртлы эчемлек кулланган килеш юлга чыгарга батырчылык иткән кеше эләгә. Аңа да хәзер ел ярымнан ике елга кадәр машина йөртү таныклыксыз калырга һәм 30 мең сум штраф түләргә туры киләчәк.
Моннан бер атна элек исерек килеш руль артына утырып юлга чыгучылар турында мәгълүмат сорагач, ЮХИДИ хезмәткәре: “Үзебезгә дә юк әле алар”,––дип сөендергән иде. Ә монда өч көнгә дүрт исерек хәлдә транспорт белән идарә итүче! Күп түгелме? Исерек икәнсең, юлга чыкма. Үзең турында уйламасаң, тормышыңны бер тиенгә дә санамасаң, сәламәтлегеңнең кадерен белергә теләмәсәң, синең белән бергә юлда хәрәкәт итүчеләр куркынычсызлыгы турында исеңә төшер. Нигә синең аркада гаепсезләр зыян күрергә тиеш? Басу–кырлар аша полиция хезмәткәрләреннән качып йөргән 23 яшьлек ир–атның, мәсәлән, яшь баласы бар. Әти кеше буларак аңа, беренче чиратта, балалар, аларның куркынычсызлыгы турында уйларга кирәк иде. Юлга чыкканда сезнең өчен җан атып, түземсезлек белән исән–имин өйгә кайтуыгызны көтеп торган туганнарыгыз хакында да онытмагыз. Зинһар, юлда сак, игьтибарлы булыгыз, исән–имин йөрегез. Без бу хәлләр турында башкалар шул ялгышлыкны кабатламасын өчен язабыз.
Гөлсинә
ЗӘКИЕВА