Яшьлегебез китмәс кебек иде...

Яшьлегебез китмәс кебек иде...
2008 елдан башлап озак еллар бер–беренә терәк, кирәк булып бәхетле гомер кичергән парларга “Ярату һәм тугрылык өчен” медале тапшырыла башлады. Шул елдан башлап 8 июль — Гаилә, мәхәббәт һәм тугрылык көне буларак билгеләп үтелә. Һәр елдагыча, районыбызның бәхетле, үрнәк гаиләләре ЗАГС бүлегенең яшь парларны кавыштыру залына җыелды. Дүрт пар алар: Иске Кырлайдан Ханна һәм Минсабир Әкбәровлар, Арчадан Фирдания һәм Әдһәм Шәриповлар, Яңа Кенәрдән Фәния һәм Рәгыйб Халитовлар, Наласадан Флера һәм Илдар Төхвәтуллиннар.
Аларның шатлыклы мизгелләрен уртаклашырга район социаль яклау бүлеге идарәсе җитәкчесе Илдус Әһлиев килгән иде. Ул котлау сүзләре белән бергә ихлас теләкләрен дә җиткерде, Расих Галимҗанов моңлы җырларын бүләк итте.
50, 60, 65 ел бергә яшәгән парлар Дан китабына кул куйганда үзләрен яшьлек-ләренә кайткандай хис итте. Шәриповлар өчен бу көн икеләтә дулкынландыргыч: алар “Ярату һәм тугрылык өчен” медаленә дә ия булды. Чөнки аларның гаиләсе нәкъ менә шушы айда туа.
50 ЕЛ БЕРГӘ ГОМЕР ИТТЕГЕЗ, АВЫР ЮЛЛАРНЫ БЕРГӘ ҮТТЕГЕЗ...
Алар гаилә корган еллар җиңел булмаган. Ул чорны узган һәркемнең гаилә кору тарихы бертөрле кебек: никах укытып яши башлыйлар да, соңрак язылышалар. Кая инде ул чакларда купшы туйлар?
Арча клубында Рәшит Ваһапов концертыннан соң кызны фатирына кадәр озатып куюдан башланган мәхәббәт тарихы Күкчә Бирәзә егете Әдһәм белән Субаш Аты кызы Фирданияне кавышу көненә китереп җиткерә һәм бүгенге көнгә — алтын туйга чаклы дәвам итә.
Алтын туй — ике кешенең мәхәббәте, хөрмәте генә түгел, тир түгеп тапкан хезмәт нәтиҗәсе дә. Аларның оныкларына да җиткерерлек матур гамәлләре бар: гомерләре хезмәттә узган. Әдһәм абый башта 40 ел “Сельхозтехника”, аннан “Сельхозхимия”дә эшләп лаеклы ялга чыккан. “Үзем шофер, үзем тәэминатчы булып “ГАЗ–53” машинасы белән бөтен Советлар Союзын диярлек әйләнеп чыктым”, — дип искә төшерә ул үткәннәрен. Ике исем йөртүче Әдһәм абыйны якыннары, дуслары Фәргать буларак белә. Әти–әнисе вербовкаланып Финляндиягә киткәч, шунда дөньяга килә ул. Фин сугышы башлангач, гаилә туган якларына кайтып төпләнә. Ләкин чит илдән чыкканда теплоход бомбага тотыла. Судан исән–сау чыксалар да, документлар су төбенә киткән була. Авылда читтән кайткан малайның исемен туу турындагы таныклыгына ялгышлык белән Әдһәм дип язалар.
Әтисе сугышка чыгып киткәндә 5 балалы гаиләнең 10 айлык нарасые Фирдания дә 7нче сыйныфны бетергәч, Иске Йорттагы тегү артелендә эшли башлый. Артель Арчага күчкәч, кыз да Арчага промкомбинатка килә һәм лаеклы ялга чыкканчы, 41 ел ярым стаж белән, шунда хезмәт куя. Иртүк китеп төн урталарында гына кайткан атаның гаиләне, балаларны карарга вакыты да калмый, шуңа Фирдания апага ике улына әти дә, әни дә булырга, эшкә өйрәтү белән беррәттән, кырыс таләпләрне дә эшкә җигәргә туры килә. И, язмыш... Юл һәлакәтендә вафат булган 7 яшьлек төпчек улын югалтканда ананың йөрәге ничек түзгәндер? Ул ачы хәсрәт кичәгедәй булган сыман. Шөкер, бүген алар оныкларының яраткан әби белән бабайсы. Төп нигездә уллары Фәрит гаиләсенә терәк, киңәшче булып тату гомер кичерәләр.
Гомер аккан су кебек, бер уңай белән юл алган тормыш елгасы салмак кына ага да ага. “Шулкадәр яшәгән кебек тә түгел, гомер сизелми узды да китте”, — ди ярты гасыр бергә яшәгән Шәриповлар. Фирдания апаның яшьләргә үз киңәше: “Бәхетле яшәүнең сере — сабырлыкта. Яшь чакта бер–береңне ихтирам итеп яшәсәң, өлкәнәйгәч бер–береңә кадерле буласың. Һәркем үз парын табып, безнең кебек тигезлектә озын гомер кичерсә иде”.
Розалия ЗИННӘТОВА