Булганын югалтмаска

Булганын югалтмаска
7 июльдә Зәй муниципаль районында үткән семинар–киңәшмә Татарстан агрокомплексының 2014 елның беренче ярты елы эш йомгакларына һәм уңышны җыйнап алу буенча бурычларга багышланды.
Семинар-киңәшмәнең пленар утырышында ясаган чыгышында Татарстан Республикасы Президенты Рөстәм Миңнеханов Татарстанда быел авыл хуҗалыгы продукциясе җитештерүнең бераз үсүен билгеләп үтте. Ул терлек азыгы әзерләү темпын тизләтү кирәклеген искәртте, әлегә эшләр узган елгыдан акрынрак бара. Шулай ук мелиорацияне үстерү, авыл хуҗалыгы предприятиеләренең бурычларын киметү, авыл хуҗалыгында эшмәкәрлекне тагын да җәелдерү мөһим булып тора. Быел беренче ярты елда авыл хуҗалыгы җитештерүчеләренә регион бюджетыннан өстәмә 800 млн. сум акча бирелгән.
Эре авыл хуҗалыгы предприятиеләрен, фермер хуҗалыкларын һәм шәхси хуҗалыкларын үстерү стратегик бурыч булып тора.
Президент әйтүенчә, һава шартларының торышы күпме уңыш алыначагын фаразларга мөмкинлек бирми. Республикада ашлыкның күчмә запасы күп түгел — 280 мең тонна чамасы.
— Уңышны саклау һәм эшкәртү, бөртекле ашлык җыйнау комбайннарын ремонтлау, транспортны мобилизацияләү һәм кышка әзерләнү көндәлек контрольдә булырга тиеш, — диде Президент.
Татарстан Республикасы Премьер–министры урынбасары, авыл хуҗалыгы һәм азык–төлек министры Марат Әхмәтов үзенең чыгышында урып–җыюны августта төгәлләү бурычы куйды. Май аендагы һәм июньнең беренче яртысындагы коры һава чәчүлекләрнең үсешенә тискәре йогынты ясады. Ә менә технологияне саклаган хуҗалыкларда хәл күпкә уңай.
Президент Рөстәм Миңнеханов быел Татарстанның азык–төлек фондына кимендә 300 мең тонна азык–төлек ашлыгы салырга кирәклеген әйтеп үтте.
—Техниканың әзерлеге әлегә 84 процент һәм барысы да сездән — уңышны җыеп алачак һәм безнең республиканың азык–төлек фондын формалаштырачак кешеләрдән тора. Без техника җитештерүчән эшләсен, бер килограмм бөртек тә югалмасын өчен бөтен шартларны тудырырга тиешбез. Бу ел безнең өчен уңышлы булыр дип ышанам, — диде ул авыл хуҗалыгы хезмәтчәннәренә мөрәҗәгать итеп.
Район авыл хуҗалыгы һәм азык–төлек идарәсендәге мәгълүматларга караганда, 8 июльгә 16 мең тоннадан (ихтыяҗ — 24820 тонна) артык печән әзерләнде, 69612 тонна (127834 тонна кирәк) сенаж салынды.
“Игенче”, “Татарстан”, “Акчишмә” хуҗалыклары үзләренә кирәк кадәрле печән әзерләп куйды. “Ак барс” агрокомплексы” ширкәтендә 17900 тонна сенаж салынды.
Район буенча бер шартлы терлеккә 10 центнерга якын азык берәмлеге әзерләнде. “Ак барс” агрокомплексы”нда — 18,4, “Курса МТСы”нда — 17,4, “Игенче”дә 17,4 центнер. “Сафиуллин” ширкәтендә — 1,6, “Арча” ширкәтендә 3,7 центнер гына.
Ильяс
ФӘТТАХОВ