Букчалар тиздән ияле була

Букчалар тиздән ияле була
Яңа уку елы башланыр алдыннан республикада “Мәктәпкә җыенырга булыш!” акциясе үткәрү матур традициягә әйләнде. Аның кысаларында районыбызның тәүге тапкыр мәктәп бусагасын атлап керүче аз керемле, күп балалы гаиләләрнең, тәрбиягә алынган һәм инвалид, әти–әниләре инвалид булган гаиләләрнең балаларына ярдәм күрсәтүдә безнең районда да актив эш алып барыла. Быел ул 2–11 сыйныф укучыларына да кагыла.
Быел районда беренче сыйныфка 558 бала керәчәк. Шуларның 172се ярдәмгә мохтаҗ. Алардан тыш, мәктәпкәчә һәм мәктәп яшендә биш һәм аннан да күбрәк балалары булган 14 гаиләгә, аз керемле, начар хәлле һәм әти–әниләре инвалид, матди хәле авыр булган мәктәптә укучы 47 балага ярдәм кирәк. Бер букча 795 сум тора. Аңа тутырылачак әсбаплар үзгәрешсез кала: канцтоварлар, хезмәт һәм рәсем дәресләре өчен җыелмалар, мәктәп формасы комплекты. Татарстанда Мәдәният елы булганга, быел букчаларга Татарстан Республикасының тарихи–мәдәни мирасын чагылдырган альбомнар, китаплар һәм балалар әдәбияты да салына.
Әлеге акция кысаларында узучы чаралар республикада 7 июль көнне башланып китте. Районыбызда урнашкан оешма, предприятие җитәкчеләре, шәхси эшмәкәрләр акциядә теләп катнашып, үз өлешләрен кертә. Быел андый мәрхә-мәтлеләр 60ка якын.
Җитәкчеләр арасында моны савап итеп кабул итүчеләр күп. “Акциядә мин теләп катнашам. Үземнең дә балаларым булганга, күңел халәтләрен аңларга тырышам, алар кимсенергә тиеш түгел, — ди бер җитәкче (исемен күрсәтмәүне үтенде). — Рамазан аенда бирелгән зәкәтнең савабы күп була, диелә хәдистә. Шуңа күрә яр-дәмне оешма исеменнән зәкәт итеп үз акчамнан бирәм”.
Арча ЗУЭСы да акциядә ел саен катнаша, букчаларны беренчеләрдән булып тапшыралар. Җитәкчесе Рөстәм Гомәров моның кирәкле акция икәнлеген әйтте. “Бүгенге көндә төрле хәлдәге гаиләләр бар, шунлыктан, мөмкинлеге булганда барлык оешмалар да ярдәм итәргә тиеш, дип саныйм. Без ел саен ЗУЭС карамагындагы 8 районга шушы акциядә ярдәм күрсәтәбез. Букчаларны тапшыру балалар күңелендә шатлыклы мизгелләре белән озак саклансын өчен чәйле, туңдырмалы табын артында бәйрәм оештырабыз. Алардагы шатлык хисләре чарада катнашкан һәркемгә рәхәтлек бирә. Әти–әниләр арасында хәтта елый–елый рәхмәт әйтүчеләр бар”, — ди ул. Моннан тыш, ЗУЭС җитәкчелеге үз оешмаларындагы хез-мәткәрләрнең мәктәп бусагасын атлап керүче балаларына да букча белән һәм акчалата булыша.
Җитәкчеләр, шәхси эшмәкәрләр ярдәмне акчалата һәм букчалата да күрсәтә. Бу 15 июльгә кадәр дәвам итәчәк. 21 июльдә балаларга тантаналы шартларда букчалар тапшыру оештырылачак. Акциядә теләге булган һәркем катнаша ала. Ярдәм итәргә теләүчеләр булса, “Бердәм Россия” партиясенең Арча җирле бүлекчесенә яки район социаль яклау идарәсенә мөрәҗәгать итә ала.
Розалия ЗИННӘТОВА