Ничә чакрым йөрисең, хат ташучы

Ничә чакрым йөрисең, хат ташучы
Июль–җәйнең иң матур ае, ул почта хезмәткәрләренең һөнәри бәйрәмнәре ае да.
Тормышыбызны хат ташучылардан башка күз алдына да китереп булмый. Авыл җирендә аеруча кадерле алар. Табигатьнең нинди чагы булса да, авырсынмыйча өйдән–өйгә газета–журналлар гына таратып калмый, яңалыклар, шатлык хисләре (пенсия китерәләр бит) дә алып киләләр. Кайчак киңәшче, психолог та булырга туры килә үзләренә. Хат ташучыларның бәйрәме уңаеннан районара почтамт җитәкчесе Ирек Фәйзрахманов белән әңгәмәгә керешкәндә сүзне бүгенге төп проблемадан башламый булмады.
— Ирек Ибраһимович, икенче яртыеллыкка газета-журналларның бәясе кинәт артуы күп кешене хафага салды. Кайберләре языла алмау сәбәпле, яраткан матбугатын алдырмаска мәҗбүр. Бу үзгәреш сезнең хезмәткә дә нык йогынты ясагандыр?
— Халык бу адымны тис-кәре кабул итте, вакытлы матбугатка язылучыларның саны кискен кимеде, 26 процентка түбән төште. Язылсыннар өчен хәтта кызыксындыру чарасы кулланырга мәҗбүр булдык: “ТАТМЕДИА” газет–журналларына язылучыларга 15 майдан 15 июньгә кадәр көнбагыш мае өләштек.
—Хат ташучыларның яше өлкәнәеп бара, аларга алмашка яшьләр ки-ләме, эшкә алганда нинди таләпләр күздә тотыла?
— Яшьләр килә. Соңгы вакытта хат ташучы булып эшкә керер өчен кайбер авылларда хәтта чират барлыкка килде. Таләпләргә килгәндә, кешенең намуслы, гадел булуы мөһим. Ләкин ул сыйфатларны эшли башлаганчы ачыклап булмый, шуңа күрә эшкә алынучы ТР почтасына куркынычсызлык хез-мәтенә җибәрелә. Аннан кандидатурасы кабул ителмичә кире борылып кайтучылар да булды. Операторларны эшкә алгач, берничә көнгә Казанга җибәреп укытып кайтарабыз.
— Халык тарафыннан хат ташучылар адресына ка-нәгатьсезлек белдерү очраклары буламы?
—Юк, киресенчә, рәхмәт сүзләрен еш ишетергә туры килә. Аеруча Яңа Кенәр зонасыннан күп килә рәхмәт сүзләре. Хат ташучылар арасында озак еллар эшләүчеләр шактый. Андыйлардан Комыргуҗадан (Әтнә районы) Гөлфинур Фазылова (38 ел), Өчиледән Зөлфия Минһаҗиева (37 елга якын), Яңа Кенәрдән Резеда Хәмидуллина (35 елга якын), Иске Ашыттан Зәбидә Шакирҗанова (30 елдан артык), Шушмабаштан Дилбәр Шәмсетдинова (30 елдан артык), 29 ел эшләүчеләр: Күпербаштан Әлфия Әхмәтшина, Үрнәктән Флера Гыймадетдинова, Ания Хәсәнова һ.б.ларны әйтер идем. Хат ташучыларга республикадан да рәхмәт хатлары күп килә.
— Һөнәри бәйрәмегезне нинди нәтиҗәләр белән каршылыйсыз?
—Бүген почта хезмәткәр-ләре халыкка 80 төрле хезмәт күрсәтә: сатуын да сата, иминиятлиләр дә, соңгы вакытта банкларга кредитларны да безнең аша түләү мөмкинлеге барлыкка килде һ.б. Айлык планны берничә йөз меңгә арттырып үтәми калганыбыз юк. Бу яртыеллыкка 103 процент итеп үтәдек. Почтага дәүләттән ярдәм күрсәтелмәгәч, ул үзе башкарган хезмәтләр өчен кергән акчага яши. Бу өлкәдә һәрвакыт алдынгы, премия алырлык итеп эшлибез. Хезмәтнең нәтиҗәсе күренгәч, эшләве дә рәхәт. Арча һәм Әтнә районнарында 252 хат ташучы эшли. Авыр хезмәтләрен тырышып башкарганнары өчен рәхмәт аларга. Һөнәри бәйрәмебез белән котлап хат ташучыларга һәм почта элемтәсе хезмәте белән бәйле һәркемгә сәламәтлек, гаилә иминлеге һәм бергә тату булып, эшләрен яратып башкаруларын телим.
Ял көнендә почта хезмәт-кәрләре бәйрәм уңаеннан Биләргә сәфәр кылачак. Изге җиргә аяк басу, шифалы суын тату аларга хезмәтләрендә уңышларга ирешү өчен да яңа көч өстәр.
Розалия САФИНА