Сакчыллыкка өйрәнәбез

Сакчыллыкка өйрәнәбез
Арча муниципаль районы 2012–2013 елларда энергетик ресурсларны куллану буенча республика районнары арасында беренче урынны алды, Мактау грамотасы белән бүләкләнде.
Район башкарма комитетының торак–коммуналь хуҗалыгы, энергетика һәм элемтә секторы мөдире Илфат Рәхимов әлеге мәсьәләләр белән турыдан–туры шөгыльләнүче кеше.
— Арча районының 2010–2015 елларга энергия саклау һәм энергия нәтиҗәлелеген күтәрү программасы нигезендә чаралар планы эшләнде, — диде ул. — Иң беренче эш итеп 2010 елда бюджет оешмалары һәм торак–коммуналь хуҗалыгы предприятиеләренең энергия паспортлары булдырылды.
Үзәктән ягып җылытыла торган район Советы, башкарма комитеты, Арчаның 1нче урта мәктәбе, Укучылар сарае, 2008–2011 елларда 5, 10нчы номерлы балалар бакчаларында, 2013 елда педагогика көллиятендә, 2014 елда күп функцияле үзәк бинасында җылылык счетчиклары куелды.
Бюджет өлкәсендәге учреждениеләрдә (барысы 54 объект) 65 газ казаны (насослар урнаштыру белән бергә) җылылыкны экономияли торганнарына алыштырылды.
2011 елда барлык күп фатирлы йортларга аерым җылыту казаннары кую тәмамланды. Авырлыклар белән барса да (моның кирәклеген аңларга теләмәүчеләр дә булды), бүген әлеге фатирларда яшәүчеләр рәхмәт укый. Чөнки фатирыңны теләгәнчә җылыта аласың. Бу эшне Арча районының беренчеләрдән булып башкарып чыгуын әйтергә кирәк.
Шулай ук лампочкаларны энергия саклый торган лампаларга алыштыру яхшы нәтиҗә бирде. Урам утларын экономияле тоту максатында бишенче линияне сузу дәвам итә.
Әлеге чараларның нинди нәтиҗә бирүен исәпләп күрсәттеләр. Иң тәэсирләндерерлек сан җылылык энергиясен файдалануда. 2013 елда ул 2009 елдагыга караганда 73 процентка кимегән.
Электр энергиясе куллану — 7, газ куллану 5 процентка кимегән.
Энергия саклау һәм энергия нәтиҗәлелеген күтәрү буенча эш дәвам итә.
Ильяс
СӘХӘПОВ