Уңай якка үзгәрешләр бар

Уңай якка үзгәрешләр бар
2014 ел — Мәдәният елы. Ул безнең районда ничек үтә? Бу һәм башка сорауларга район мәгариф идарәсе җитәкчесе Илнур Котдусов җавап бирә.
—Мәдәният елы кысаларында, алдан төзелгән план нигезендә, күптөрле массакүләм чаралар үткәрелде. Үзешчән сәнгатьне үстерү, халыкны сәнгатькә тарту, талантлар барлау максатыннан оештырылган предприятие, оешма, учреждение, авыл җирлекләре арасында барган иҗат концертларына нәтиҗә ясалды. “Авылым килене” район бәйгесе уңышлы чыкты. Вокал дуэтлар бәйгесендә яшь талантлар сәхнәгә менде. “Балкыш” республика бәйгесе сәнгатькә гашыйк өлкәннәребезне сәхнәгә тартты. Быел “Балкыш”ның район, зона ярышлары сентябрьдә үтәчәк. Шулай ук русларның “Каравон”, татарларның “Түгәрәк уен” республика бәйгеләрендә, мариларның “Семык” республика бәйрәмендә, Сабантуйларда, якташлар очрашуларында катнашу да зур урын алып тора. Быел, мәсәлән, “Түгәрәк уен”да Ташкичү мәдәният йортының “Өммегөлсем”, Шура авыл клубының “Чордашлар” фольклор коллективлары өченче дәрәҗә дипломант исеменә лаек булды. Июль, август, сентябрь айларында яңа ачылган клубларда районара концертлар булачак. Без Биектау районы белән концертлар алышачакбыз. “Казан арты” тарих-этно-графия музее төрле юнәлештә эш алып бара. Әлеге коллектив тарафыннан ярты елда 56 экскурсия, 13 чара (очрашулар, бәй-геләр, күргәзмәләр, конференцияләр һәм башкалар) үткәрелде. Китапханә-ләрдә даими рәвештә төрле кызыклы чаралар оештырыла. Үзәк китапханә каршында “Яшәү яме” клубы уңышлы эшли. Быел Үзәк китапханә оешуга 80 ел тулу уңаеннан китапханә ветераннары белән очрашу оештыру планлаштырыла. Шулай ук тәҗ-рибә уртаклашу, киңәш-ләшү, аралашу максатыннан күчмә семинарлар үткәрүне дә күз алдында тотабыз.
—Авыллардагы мәдәният учреждениеләрендә проблемалар күп. Биналар иске, эшләү өчен мөмкинлекләр чикле. Бу өлкәдә сезнең планнарыгыз ничек? Мәдәният елы уңаеннан нинди чаралар планлаштырыла?
—Бу эш, иң беренче чиратта, финанс белән бәйле. Шулай да, акрынлап булса да, район мәдәният дөньясы үзгәреш кичерә. Узган елларда республика программасы буенча Арча станциясендә, Сикертәндә, Симетбашта күп функцияле мәдәният үзәкләре төзелде, күптән түгел шундый үзәк Пөшәңгәрдә тамашачылар өчен үз ишекләрен ачты. Төзелешләр киләчәктә дә дәвам итәчәк. Аннан бер яңалык бар—республикабыз Президенты карары нигезендә авыл мәдәният учреждениеләрен төзекләндерү эшләре башлана. Без дә райондагы ике мәдәният учреждениесен шушы программага керттек.
—Хисап җыелышында мәдәният хезмәткәрләренең хезмәт хакы артуы турында сүз булган иде. Ул тормышка аштымы?
—Әйе, быел хезмәт хаклары артты. Ул уртача 6–7 мең сум гына иде. Хәзер хезмәт хакы белемнән һәм стаждан чыгып билгеләнә. 20–30 ел эшләгәннәр 16–17 мең сум ала. Бөтен гомерләрен мәдәният өлкәсенә багышлаучыларның хезмәтен шулай бәяләү яхшы, сүз дә юк. Тик менә яшьләр бу очракта читтә кала. Шуңа алар мәдәният учреждениеләрендә эшләргә бик атлыгып тормый. Мәдәният дөньясына яңа сулыш өрү өчен нәкъ менә яшьләр кирәк.
Гөлсинә ЗӘКИЕВА