Яңалык өстенә яңалык

Яңалык өстенә яңалык
Соңгы елларда шәһәр, районнарда яшәүчеләрнең тормыш шартларын яхшыртуны күздә тоткан төрле дәүләт программалары эшли башлады. Мисал итеп тузган торак программасын гына алыйк. Аның ярдәмендә Арчада шактый гаилә бүген барлык шартлары тудырылган, уңайлы, иркен фатирларда яши. Әмма быел программага берникадәр үзгәреш кертелгән. Бу турыда тулырак аңлатма алу өчен без Арча шәһәре башкарма комитеты җитәкчесе Рафил Исмәгыйлевка мөрәҗәгать иттек.
— Программаның төп бурычы — тузган торакта яшәүчеләрне барлык шартлар тудырылган торак белән тәэмин итү. Үткән еллар белән чагыштырганда бу программаның тормышка ашырылуы быел бераз кыенрак. Сәбәбе — халык программага кертелгән яңа шартларны бердәм кабул ит-мәде, гәрчә, программа буенча торак төзү инде башланса да.
Закон нигезендә тузган торакта яшәүчеләр ике юнәлештә карар кабул итә: җирле органнарга гариза язып, агымдагы елның 1 октябренә кадәр тузган торакны үзгәртеп корып, яшәрлек хәлгә китерергә ризалык бирәләр һәм киләчәктә әлеге программада катнашудан төшеп калалар. Икенче юл — тузган торакны сүтәргә ризалык биреп, һәр квадрат метрга 11 мең сумнан дәүләт ярдәмен ала һәм калган сумманы социаль ипотека шартларында түләп, яңа фатирга ия булалар. Йортлары тузган торак программасы исемлегенә кереп, моңарчы гариза язмаучылар шәһәр башкарма комитетына килеп, гариза язарга тиеш.
Тагын бер яңалык Арча җирендә юл ярырга әзерләнә. Бу — территориаль җәмәгатьчелек үзидарәләре төзү. Алар ни өчен кирәк һәм нинди хезмәтләр башкарачак? Әлеге сорауларга да Рафил Исмәгыйлев җавап бирде.
—Бүген халык мәнфә-гатьләрен кайгыртучы 131нче закон тулы көченә эшләми, шуны тагын да үтемлерәк итү, җәмәгатьчелекне идарә органнарына тарту максатыннан территориаль җәмәгатьчелек үзидарәләре (алга таба ТҖҮ) оеша. Моның үрнәкләре Россиянең кайбер төбәкләрендә бар һәм алар уңышлы гына эшләп килә. Халык белән дәүләт арасында арадашчы сыйфатында эшләячәк ТҖҮ аңлату, оештыру эшләре башкару белән бергә, халыкның иң мөһим соравын, гозерен канәгатьләндерү өчен нигезләмәләр белән дәүләттән ярдәм сорарга тиеш. Халыкны борчыган мәсьәләләр, сораулар нигезендә заявка төзелеп, грантка тәкъдим ителә. Алданрак өлгерүчеләргә грантлар быел ук бирелергә мөмкин. Һәм шул эзлеклелек белән ел саен ярдәм булачак. Соңгы елларда авыл җирлекләренә хөкүмәт грантлар бирә башлады, әмма шәһәр округларына андый ярдәм юк иде. Бу программа тормышка ашырыла башласа, халык өчен зур ярдәм булачак. Әйтик, халык соравы буенча юллар салу, парк төзү һ.б. эшләр башкарылырга мөмкин.
Арчада биш ТҖҮ төзү планлаштырыла. Шәрыкъ, көнбатыш, үзәк, көньяк һәм питомник өлешләрендә. Санап үтелгән тирәлектә яшәүчеләр җыелышлар үткәреп, халыкка аңлату өчен урыннарда инициатив төркемнәр төзи һәм төркем әгъзалары конференция үткәрү турында карар чыгара, ТҖҮнең чикләрен билгели, делегатлар сайлый. Конференциягә әзерлек эшләре барганда аны үткәрү урыны һәм вакыты турында җирле массакүләм мәгълүмат чараларына белдерү бирәләр. Районда андый конференцияләр үткәрү якынча 26 июль тирәсенә планлаштырыла. Делегатлар ТҖҮ җитәкчеләрен һәм әгъзаларын сайлаячак. ТҖҮ җитәкчеләренә башкарган эшләре өчен хезмәт хакы да түләнәчәк. Ул суммалар хөкүмәт тарафыннан районнарга субсидия итеп бирелә.
Бу мөһим эштә барлык шәһәр халкын актив катнашырга чакырабыз.
Розалия
ЗИННӘТОВА