Үзвакытында рәсмиләштерү кирәк

Үзвакытында рәсмиләштерү кирәк
Хәзерге вакытта республикада 195431 бала мәктәпкәчә гомумбелем учреждениеләренә йөри. Өстәмә компенсациянең керемнәрне һәм 6 айга билгеләнүен исәпкә алып, июль–сентябрь айларында социаль яклау органнары өстәмә компенсация билгеләүгә хокукны кабат теркәү үткәрә.
Социаль яклау органнары, халыкка уңайлы булсын дип, документларны кабул итүне балалар бакчаларына барып та оештырды.
Әлеге эш безнең районда ничек тора? Район социаль яклау идарәсенең бүлек мөдире Лилия Җәләлетдинова түбәндәгеләрне сөйләде.
—2014 елның 1 гыйнварыннан ата–аналар түләүләре арту сәбәпле, балалары мәктәпкәчә гомуми белем учреждениеләренә йөрүче гражданнарга, гаилә кеременә карап, өстәмә компенсация бирелә башлады, — диде ул. — Өстәмә компенсация гаиләнең бер әгъзасына уртача керем 20 мең сумнан кимрәк булганда билгеләнә һәм түләнә.
Арча муниципаль район башкарма комитеты, өстәмә компенсацияне үзвакытында кабат рәсмиләштерү максатында, муниципаль бюджет мәктәпкәчә гомумбелем учреждениеләрендә документларны кабул итү графигын раслады.
2014 елның 1 гыйнварына 1370 гариза кабул ителгән һәм 30 июньгә кадәр компенсация билгеләнгән. 2014 елның 31 декабренә кадәр чорга өстәмә компенсация рәсмиләштерүгә 14 июльгә 339 гариза бирелгән.
Компенсация алу өчен гариза язарга, ата–ананың паспортлары, баланы гомумбелем учреждениесенә урнаштыру турында килешү, балаларның туу турында таныклыклыгы, мәктәпкәчә балалар учреждениесе өчен түләү квитанциясе күчермәләре, банкта ачылган счет номеры кирәк.
Шулай ук гаилә әгъзаларының барысының да соңгы өч айдагы керемнәре турында белешмә булу шарт.
Ильяс СӘХӘПОВ