“Ватан”да — печән бәйрәме

“Ватан”да — печән бәйрәме
Апаз басуларында йөргәндә балачак еллары күз алдына килде. Авылларда кеше күп иде ул вакытларда, процент печәне бүлгән көннәр чын бәйрәм була иде. Машина–тракторлар, күбрәк җигүле атлар, сәнәк, тырма тоткан абый–апалар, бала–чага — бар да печән басуында. Үземнеке үзәктә дигәндәй, печәнлекләр тулгач, кибәннәр куйгач халык икенче көнне тыныч күңел белән, дәртләнеп эшкә чыга.
Мондый матур бәй-рәмнәрне хәзер “Ватан”, “Курса МТСы”, “Ак барс” агрокомплексы” ширкәтләрендә генә күреп була.
— Кичә пөшәңгәрлеләр печән алды, бүген менә Апазда бирәбез, — ди “Ватан” ширкәте җитәкчесе Мансур Әхмәтов. — Беркемне дә читтә калдырмыйбыз, пенсиядә булган кешеләр дә, бюджет оешмаларында эшләүчеләр дә ала.
Апаз авылыннан ерак түгел генә печән җире. Бер тукталып, хәйран калып күзаллап тордык: анда халык, андагы техника, басуны иңләп яткан төрле зурлыктагы печән төргәкләре. Пресслаучы тракторлар гына да дистәләп, ташучыларын санап бетерерлек түгел. Хәзер инде сәнәк белән печән төямиләр, әмма моңа карап бәйрәмнең яме кимемәгән.
— Өч сыерыбыз, дүрт бозау бар, — ди печән төргәге өстендә ял итеп утыручы Гөлүсә Фәйзрахманова. — Көн саен 5–6 чиләк сөт тапшырабыз, акчасын вакытында биреп баралар.
Гөлүсә амбарда, ире Дамир фермада эшли. Аның янәшәсендә урын алган Зәлидә Фәйзиеваларның да сыерлары икәү.
— Печән җитәрлек быел, башка елларда да азыкны мул бирәләр иде, — ди ул.
“Ватан” ширкәтенең иген басуларын да иңләп чыктык. Узган ел корылыктан яргаланып ята иде бу җирләр, ә быел, күз тимәсен, һәркайда карап туймаслык күренеш — солы — урман кебек, борчак, азык катнашмалары искиткеч. Әнә шул печән басуында мәш килгән кешеләр хезмәте бу. Ныклы тәртип, технология буенча эшләү нәтиҗәләре. Күпьеллык үләннәрне дә гел яңартып торганга мул уңыш бирә алар.
Апазда яңа ферма, ат абзары төзиләр. Фермаларны соңгы елларда үзгәртеп, яңартып куйдылар. Төзегәннең генә ки-ләчәге бар.
15 июльгә булган мәгълүматларга караганда, район буенча халыкка 4355 тонна печән бирелгән. “Мәрҗани” ширкәтендә — 1059, “Ватан”да — 750, “Курса МТСы”нда 550 тонна. “Сафиуллин”, “Шиһабеддинов” хуҗалыклары әлегә бөтенләй бирмәгән. Ә менә яңа оешкан И.Хөсәенов крестьян–фермер хуҗалыгының (Кушлавыч, Иске Җөлби, Орнашбаш авыллары) 140 тонна печән бирә алуы игътибарга лаеклы.
Район буенча бер шартлы терлеккә 13,6 центнер азык берәмлеге әзерләнде. “Игенче”дә — 26, “Ак барс” агрокомплексы”нда 25 центнер.
Хуҗалыкларга барысы 24820 тонна печән әзерләргә кирәк булып, шуның 23126 тоннасы туплап куелды. 100237 тонна (127834 тонна кирәк) сенаж салынды.
Урак өсте җитте. 14 июльдә “Татарстан” ширкәтендә комбайннар парады, ындыр табакларын кабул итү булды. Юл кырыйларындагы арышны урып та куйдылар бу хуҗалыкта. Бөртекнең дымлылыгы 43 процент. 30–35 процент булганда теземнәргә сала башларга вакыт. Көн саен дымлылыкның 2–3 процентка кими баруын исәпкә алсак, якындагы берничә көндә арыш урагы башланып китәчәк. Чүпле басуларны теземнәргә салмыйча булмый.
14 июльдә хуҗалык җи-тәкчеләре, баш белгечләре авыл хуҗалыгы һәм азык–төлек идарәсендә азык әзерләү, яңа уңыш балансы, урып–җыю, ашлык эшкәртү техникасының әзерлеге, көзге чәчүгә җир әзерләү, терлекчелек мәсьәләләре буенча хисап тотты. Әйбәтләр дә, әле эшләп җиткермәүчеләр дә бар. Хәзер иң мөһиме — басуда булган уңышны югалтуларсыз җыйнап алу.
Ильяс
ФӘТТАХОВ