Кешеләргә шатлык китерүче

Кешеләргә шатлык китерүче
Һәрбер кешенең үз язмышы. Кемдер бәхетен шәһәрдә таба. Ә менә Суфия Фәйзрахманова Казанда туса да, бәхетен авылда тапкан.
Суфия 1924 елның 8 июлендә тугыз балалы гаиләдә дөньяга килә. Әтиләре хисапчы булып эшли, әниләре балалар тәрбияләп, өй эшләре белән шөгыльләнә. Ул бик дини була һәм балаларын да дин буенча тәрбияли, аларга әхлак тәрбиясе бирә. Суфия кечкенәдән медицинага гашыйк була. Шуңа күрә дә ул унъеллык мәктәпне бетерү белән Казан медицина институтының педиатрия бүлегенә укырга керә.
1947 елны Суфияны Арча районы Хәтнә авылы хастаханәсенә эшкә җибәрәләр. Хастаханәнең баш табибы, хирург Мостафа Асабаев аны мөдир итеп билгели. Суфия әлеге эшне башкара алуына шикләнеп кала. Тик вакыт барысын да җайга сала, аның янында гел яхшы әзерлекле, үз эшен әйбәт белүче табиблар, фельдшерлар һәм шәфкать туташлары була. 1950–60нчы елларда Татарстанда трахома авыруы белән газапланучылар күбәя. Әлеге авырудан кешеләр күрү сәләтен югалтып, сукырая. Казанда хәтта трахоматоз институты эшли башлый. Бу чир белән көрәшү өчен югары белемле, үз эшенең остасы булган табиб кирәк була. Әлеге урынга Суфия Фәйзрахманованы җибәрергә карар кылалар. 1961 елга кадәр ул күз табибы булып эшли, 1961 елдан Яңа Кенәрдә баш табиб вазыйфасын башкара.
Суфияга бик авыр шартларда эшләргә туры килә. Табиблар җитми, үзе генә эшләгән чаклары да була. Ул балаларны да, олыларны да дәвалый. Аннан, гаиләгә дә вакыт табарга кирәк. Ике кызы да, ире дә игътибар сорый. Суфия барысына да өлгерә. Күп кенә җәмәгать эшләрендә дә катнаша. ТАССР Югары Советына, күп тапкырлар Яңа Кенәр авыл һәм район Советларына депутат итеп сайлана.
Эше күп булуга карамастан, ул беркайчан да төшенкелеккә бирелми, һәрвакыт күңеле шат, йөзе көләч.
Хезмәттәшләре белән дә яхшы мөнәсәбәттә була ул. Алар өчен һәрдаим өстәмә укулар үткәрә, белемнәрен арттырырга ярдәм итә. Шәфкать туташлары Лидия, Гөлсем, Нәкыя, Сәйдә, Бәрия, Раушания, Рузалиягә аеруча рәхмәтле Суфия апа. Аның гомер юлында табиб хезмәтенә тугрылыклы, яхшы кешеләр генә очрый. Үзенең остазы итеп хирург Николай Родосскийны һәм Гөлсем Кудрикованы саный ул. Шулай ук Арча район хастаханәсенең элекке баш табибы Владимир Кувинга, санэпидстанцияне озак еллар җитәкләгән Эдуард Әхмәровка бик рәхмәтле. Алар чирек гасыр бергәләп халык сәламәтлеге сагында торды.
Тормыш иптәше аның зур терәге була. Ул фин һәм Бөек Ватан сугышларында катнаша. Ире белән ике кыз тәрбияләп үстерәләр. Гөлнур әнисе юлыннан китә. Гомере буе табиб булып эшли, хәзерге вакытта лаеклы ялда. Кечкенә кызы Әлфия икътисадчы һөнәрен сайлый. Кызлары һәм оныклары Суфия апаның хәлен белеп, аңа ярдәм итеп торалар.
Суфия Абдулла кызының хезмәте игътибарсыз калмый. Мактау грамоталары күп.1964 елда ТАССРның атказанган табибы исеменә лаек була. 8 июльдә Суфия апага 90 яшь тулды. Ул көнне юбилярны котларга кунаклар күп килде. Аны чәчәк бәйләмнәренә күмделәр.
Юбилей көнендә өч буын табиблары очрашып, хатирәләрен яңартты, фикер алышты. Яшь буынга һөнәреңә тугры калырга, аны яратырга, һәрвакыт кешеләргә ярдәм кулы сузарга кирәк, дигән киңәш-ләрен бирде Суфия Абдулла кызы.
Венера
ӘХМӘРОВА