И-и, сөенде Карина

И-и, сөенде Карина
Балаларны тернәкләндерү үзәгендә, чын мәгънәсендә, бәйрәм булды. Каринаны гына күр син, күз бәйләп кайчы белән бүләк кисеп алу уенында кулына эләккән матур янчыкны күргәч, дус кызларына күрсәтә-күрсәтә, и-и, сөенде дә инде. Бу чараның бөтен әһәмияте дә шунда иде.
“Мәрхәмәтлек” үзәгенең гаилә һәм балаларга социаль ярдәм күрсәтү бүлеге мөдире Фәния Сәлахова мәдәни-спорт чарасын “Кече сабантуй” дип атады. Аны “Мәрхәмәтлек” үзәге һәм Арча шәһәрендәге “Волонтер” ирекле хәрәкәт үзәге оештырды. Ак футболкалар кигән волонтерлар (мәктәп укучылары, педагогика көллияте студентлары) Сабантуй мәйданына, әйтерсең лә, шатлык-сөенечләр сипте! Дәртле музыка астында балаларны бергәләп биергә чакырдылар. Алар бер генә балага да тик утырырга яки күңелсезләнергә ирек бирмәде: бергәләп күзләрне бәйләп кайчы белән призларны кисте, чүлмәк ватты, узыша-узыша (кем тизрәк) сок эчте, таяк тартышты, сулы чиләкләр белән йөгерде, аркан белән тартышты һ.б. Сабантуйны “Арча” телерадиокомпаниясе” җитәкчесе Рамил Мөхетдинов, балалар белән балаларча сөйләшеп, кызыклы итеп алып барды. Берсеннән-берсе кызыклы призлар балаларны уеннарга дәртләндереп торды.
Ак футболкалы волонтерлар арасында сары футболка кигән Җәмилә Яруллина белән Рамилә Диярова да бар иде.
— Сары футболканы волонтерлыкта ышаныч яулап, стаж туплагач бирәләр, — дип сөйли Җәмилә Равилевна.
— Без — координаторлар, — дип сүзгә кушылды Рамилә Диярова. — Ягъни, үзара килештерүчеләр, яраклаштыручылар. Әле менә яңа гына “Шатлык” лагеренда наркотикларга каршы чара оештырдык.
Иске Чүриле кызы Рамилә Арча педагогика көллияте студенты. Арча кызы Җәмилә — эшмәкәр. Балалар белән аралашудан, аларны сөендерә алудан күзләрендә очкыннар уйнаган волонтерларның хәлен аңласам да:
—Ярты көнегез бүген шушында үтте, алдан оештыру эшләре белән күпме вакытыгызны сарыф иткәнсездер, берәү дә акча түләми, нәрсә бирә сезгә бу чара?— дип сорыйм.
—Башкаларга игелек эшләү, ярдәм итә алудан җанга рәхәт, — диде кызлар.
Сабантуйны оештыруда матди ярдәм иткән иганәчеләр Ләйсән Яруллина , Талия Сәлахетдинова, Юлия Хәнәфиева , Зөлфия Гафарова, Алимас Әмировны әйтеп үтәсе килә.Тернәкләндерү үзәгенә дә бер кочак бүләкләр бирелде.
... Таяк тартышуда Русланга тиңнәр булмады. Зурраклар арасында Тимур иң көчле егет булып чыкты. Карина бик матур бии дә икән. Тернәкләндерү үзәгенең бөтен максаты— мөмкинлекләре чикләнгән балаларны дүрт стена арасыннан чыгару, бертөрлелектән коткару, ничек тә аларны тормышка яраклы итеп әзерләү. Бүген биредә тәрбияләнүче балаларның тормышы тагын да яктырып китте. Аларның куанганын күрү әти–әниләргә дә зур шатлык иде. Волонтерлар “Балалар балаларга” девизы белән хәрәкәт итә. Балалар гына бер–берсен чын–чынлап аңлый ала. Үсеп җиткәч тә алар җәмгыятьтә аңлашып яшәсәләр иде.
Румия