Фикер алыштылар

Фикер алыштылар
Район башкарма комитеты җитәкчесенең беренче урынбасары Эльмира Хәстиева җитәкчелегендә “Энергоэффектлылык — тормыш рәвеше” темасына түгәрәк өстәл узды. Анда район бюджет учреждениесе вәкилләре, авыл җирлекләре башлыклары, энергия белән тәэмин итүче оешма һәм район хакимияте вәкилләре катнашты.
Соңгы елларда энергияне экономияле файдалану турында күп сөйләшенә. Шуның максатында районда учреждениеләрнең котельныйларына яңа казаннар, йортларга электродиодлы лампочкалар куела, урам утларына бишенче линия сузыла һ.б.
Әмма энергияне саклау һәрвакыт мөһим булып кала бирә. Энергияне саклау буенча барлыкка килгән проблемаларны хәл итүдә дәүләт сәя-сәтен тормышка ашыруга багышланган чыгышында Эльмира Хәстиева энергияне саклау өлкәсендә дәүләт контроле һәм Россиянең кайбер регионнарында инде кулланылыш алган энергосервис килешүе турында сөйләде.
Энергосервис килешүе тотылган чыгымнарны янга калдыру хисабына энергия саклау буенча технологияләр кулланып файда алуга юнәлгән.
Район финанс–бюджет палатасы рәисе Фәнис Исмәгыйлев бюджет өлкәсендә килешүләрне тормышка ашыру турында сөйләде. Әлеге темага бәйле рәвештә энергоаудит һәм социаль өлкәдә объектларда энергия буенча менеджмент мәсьәләләре турында да сөйләшенде. Инфраструктура бүлеге җитәкчесе Рөстәм Хәбибуллин энергосервис проблемалары һәм бүгенге хәле турында аңлатты.
—Безнең мәктәп узган ел ныклап төзекләндерелде. Шул вакытта экономияле казаннар куелып, яңага алмаштырылган тәрәзәләр хисабына без 50 процент энергияне янга калдырдык, — ди Шушмабаш мәктәбе директоры Рәзилә Шәймәрданова.
Арчаның 5нче гимназиясе директоры Фатыйх Хәкимуллин мәктәптәге барлык лампочкаларны экономиялегә алмаштырып, энергияне саклап булачагын әйтте һәм моны энергосервис килешүе нигезендә хәл итеп булачакмы, дигән сорау куйды. Фәнис Исмәгыйлев әйтүенчә, экономия ясаучыларга мондый килешүләр отышлы булып тора һәм ул хәл ителү юлында. Чөнки энергия саклаудан калган экономия хисабына башка хезмәтләр өчен исәп–хисап ясап булачак.
“Татэнергосбыт” ачык акционерлык җәмгыяте инженеры Рамил Әхмәтгалиев фикеренчә, андый килешүләр төзү өметле. “Бу юнәлештә эш алып барып, бөтен сорауларны да чишеп булачак”, — дип ышандырды ул.
Бу яңалык нәтиҗәсен киләчәк күрсәтер. Фикерләргә килгәндә, түгәрәк өстәл әңгәмәсендә катнашучылар тарафыннан мондый очрашуларны ешрак үткәрергә кирәклеге һәм күп кенә сорауларны уртага салып сөйләшеп булачагы турында әйтелде.
Розалия ЗИННӘТОВА