Начар бәя алдылар

Начар бәя алдылар
Муниципаль район башлыгы Алмас Назиров 17 июльдә Арча шәһәрендәге оешма, учреждениеләрнең кышкы сезонга әзерлеге белән кызыксынды. Ул “Бәләкәч”, 2, 5нче номерлы балалар бакчаларында, район Мәдәният йортында, шәһәр Советында модульле котельныйларда булды, территорияләрдәге тәртипкә игътибар бирде.
Мондый эссе көннәрдә салкын кышлар бик еракта кебек. Кайбер җитәкчеләр дә шулай уйлый булса кирәк, көндәлек мәшәкатьләр белән шул “уч төбе кадәр” бинага керергә вакыт тапмыйлармы яисә көн дә күреп күзләре күнеккәнме? Ә бит шул котельныйлар көннәр суытуга иң кадерле әйбергә әверелә. Газ, электр белән эш иткәнгә хәтәрлек тә бар аларда, шуңа күрә кайда нәрсә булырга тиешлеге язылган инструкцияләр дә таратканнар үзләренә.
— Шушмабаш, Ашытбаш, Шекә мәктәпләре котельныйларын барып карагыз, әле берегездә дә тиешле тәртипне күрмим, — диде район башлыгы. — Пекарнядагы кебек чисталык булырга тиеш котельныйларда.
Дөрес, яңа сезон алдыннан нәрсәдер эшләргә тырышканнар. Тик минеке дип эшләү юк. Алак–шалак, булдыксыз кеше кулы белән эшләнгән. Завод буявы белән буялган насосларны тагын нигә буярга? Буяу идәннәр, стеналарга чәчрәгә. ничә төрле буяу куллансалар, шуның кадәр тамган, чәчрәгән. Үз өендә берәү дә алай эшләми.
Электр чыбыклары үрмәкүч оясын хәтерләткән котельныйлар да очрады. Мәдәният йортыныкы аеруча аерылып тора, ишекләре үк пычрак, бик начар әзерлек, дигән бәя бирелде.
Район башлыгы башкарма комитетның торак–коммуналь хуҗалыгы, энергетика һәм элемтә секторы мөдире Илфат Рәхимовка әлеге мәсьәләләр белән конкретрак шөгыльләнергә, бар да тәртиптә булган модульле котельный үрнәгендә семинар үткәрергә кушты.
Алмас Әминович территория-ләрнең торышыннан да канәгатьсезлек белдерде. Капка–койма буйларында үләннәр чабылмаган, үзләре таләп итәргә тиешле оешмалар каршында тәмәке төпчекләре, чүп–чар ауный. Район башлыгына үзенә себерке алып, чисталык урнаштырып бирергә туры килде.
Бездә хәзер кыш көннәрендә бер бинада да туңып утырмыйлар, оешма җитәкчеләренең ягулык эзләп чабасы юк. Бары тик инде эшләп биргән модульле котельныйларны курчак өедәй хәлдә тотарга гына кирәк. Һаман да “Алма пеш, авызга төш”, – дип яшәргә ярамый.
Ильяс ФӘТТАХОВ