Комбайннар уракка чыга

Комбайннар уракка чыга
Арыш басулары күзгә күренеп өлгерә. Яздан матур гына чыкса да, майдагы эсселек, корылык үзенекен итте, бу культураның уңышы өмет иткән кадәр булмаячак. Сирәк урыннарда чүп үлән басты, эт эчәгесе тартып ега, астан арышның икенче каты күтәрелә. Кыскасы, җиңел булмаячак быелгы урак өсте.
Район буенча бер шартлы комбайнга уртача 387 гектар иген мәйданы туры килә. “Арча” ширкәтендә ул — 624, “Аю”да — 524 гектар. Бу әле бөтен комбайннар эшләп торганда. Тик тору, ватылулар булганын исәпкә алсак, эш күләме тагын да арта дигән сүз.
17 июльдә республика Авыл хуҗалыгы һәм азык–төлек министрлыгы вәкилләре катнашында махсус комиссия комбайннарны, ындыр табакларын кабул итте. Болай гомуми бәя начар түгел. “Игенче” ширкәтендә, һәр елдагыча, җаваплылык тоеп әзерләнгәннәр. Һәр комбайнга икешәр кеше беркетелгән, күбесе тәҗри-бәле. Кабул итү вакытында һәр комбайнны эшләтеп карадылар. Ындыр табаклары да тәртиптә.
Шушы көннәрдә әлеге хуҗалыкта булырга туры килгән иде. Хәлим Вилданов комбайн белән шепкән урдыра. Әлеге культура 500 гектарда, орлыгы өлгергән инде.
“Игенче” ширкәтенең көзге һәм язгы бодай басулары мул уңыш вәгъдә итә.
“Кырлай”, “Ватан”, “Северный”, “Ак барс” агрокомплексы”, “Курса МТСы”, “Татарстан”, “Аю” ширкәтләренең әзерлеге әйбәт.
Районда арышны аеры уруга иң беренче булып “Татарстан” ширкәте кереште. Фәнил Гыйлаҗев башта күпьеллык үләннәр урдырды, хәзер менә арышны теземнәргә сала.
Терлек азыгы әзерләү дәвам итә. 16 июльгә район буенча бер шартлы терлеккә 14,7 центнер терлек азыгы әзерләнде. “Ак барс” агрокомплексы” ширкәтендә — 27, “Игенче”дә 25,7 центнер.
Барысы 109683 тонна сенаж салынды. “Ак барс” агрокомплексы”, “Аю”, “Курса МТСы”, “Игенче”, “Татарстан”, “Нива” ширкәтләре үзләренә җитәрлек сенаж салдылар.
“Ак барс” агрокомплексы” ширкәте көзге чәчү өчен кирәк кадәр җир әзерләде. 2000 гектарның 1200 гектары — пар җирләре.
Ильяс ФӘТТАХОВ