Юл игътибарсызлыкны кичерми

Юл игътибарсызлыкны кичерми
Россия Федерациясе Эчке эшләр министрлыгының Арча районы буенча бүлеге хезмәткәрләре белән берлектә ЮХИДИ бүлекчәсе хезмәткәрләре июль ае башыннан юлларда өч рейд үткәрде.
Шуларда куркынычсызлык каешы такмыйча юлга чыккан 51 кешегә беркетмә төзелде. Аларга 1000әр сум күләмендә штраф салыначак. 8енә 5әр мең сум штраф түләргә туры киләчәк. Монысы тиешсез урында алдагы машинаны узарга чыккан өчен. Спиртлы эчемлек кулланган килеш руль артына утыручылар июльнең 20 көнендә генә дә 10га җиткән. Исерек хәлдә юлга чыгып, ЮХИДИ хезмәткәрләре тарафыннан тоткарланган, шуның нәтиҗәсендә 30 мең сум штраф түләп, өстәвенә, ел ярым–ике елга таныклыксыз калучылар һаман да бар.
Июль аенда 44 юл–транспорт һәлакәте теркәлде. Шуларның бишесе кеше-ләрнең тән җәрәхәтләре алуга китерде. 2 июль көнне кичке 9 сәгатьтә Арча—Яңа Кенәр юлында (Чиканас белән Әзәк авыллары турысындарак) кызу тизлек белән килгән “Кио–Рио” машинасы идарәне югалта һәм каршы як полосага чыга, берничә тапкыр әйләнә. Рульдәге хатын–кыз да, пассажиры (ире) да, тән җәрәхәтләре алып, хастаханәгә озатыла.
4 июльдә шулай ук кичке 9 сәгатьтә Сурнар турысында юл–транспорт һәлакәте була. “ВАЗ–2114” машинасы узарга дип чыга һәм каршы як полосадан килүче “Митцубиси” белән бәрелешә. Нәтиҗәдә, янында утырган хатыны белән баласына беренче ярдәм кирәк була.
10 июльдә көндезге 2нче яртыда Арча—Яңа Кенәр юлында (Иске Иябаш белән Яңа Кырлай арасы) кызу тизлек белән барган “Опель–Астра” машинасы (рульдә хатын–кыз була) идарәне югалта һәм каршы як полосага чыгып, әйләнә. Үзе, 2009, 2011 елгы ике оныгы (балалар өчен махсус креслода булу сәбәпле, аларга артык зур зыян килми) хастаханәгә озатыла.
12 июльдә төштән соң 3 сәгатьтә Орнашбаш авылы тирәсендә тагын бер юл һәлакәте була һәм анысы да хатын–кыз катнашында. Әтнә ягыннан кызу тизлек белән килгән “ВАЗ–2114” машинасы борылышка сыймый һәм әйләнә. Нәтиҗәдә, үзе, пассажиры зыян күрә.
18 июльдә Арча—Сеҗе юлында булган юл һәлакәте дә тизлекне арттыру нәтиҗәсендә килеп чыга. Руль артындагы 22 яшьлек кыз идарәне югалта һәм берничә тапкыр әйләнә. Үзе, янындагы 21 яшьлек пассажиры зыян күрә. Аларны куркынычсызлык каешы тагулары гына саклап кала.
Руль артында сак булыгыз. Юл игътибарсызлык һәм ваемсызлыкны гафу итми. Үзегезне, якыннарыгызны хәсрәт утына салмагыз.
Гөлсинә ЗИННӘТОВА