Яңа ашлык кайта

Яңа ашлык кайта
Кыр эшләренә беренчеләрдән булып, гадәттә, “Татарстан” ширкәте керешә. Арыш урырга да иң алдан алар чыкты. Сынап карау өчен 15 гектарда урганнар иде. Менә шушы мәйданнарны суктырып та алдылар.
— Гектардан 27,8 центнер чыкты, — ди баш агроном Нуретдин Ибраһимов.— Дымлылык югарырак, шуңа тиз арада эшкәртеп, элеваторга озатабыз. — Әкренләп шулай ега барачакбыз инде арышны.
Саламны рулонлап урнаштырып баралар.
Арышның бөртекләре эре быел, шуңа дымлылыгы әкрен кими. ”Арча”, ”Сафия-1” ширкәтләрендә дә арыш уралар.
“Ак барс” агрокомплексы” ширкәтендә көзге бодайны теземнәргә сала башладылар.
— Арышка керешергә иртәрәк әле, — ди баш агроном Рөстәм Мөхәммәдиев. — Дымлылык 40–45 процент чамасы, ә фән 30–35 процентка калгач урырга куша.
Әлеге хуҗалыкта игеннәр мул уңыш вәгъдә итә. Кайда ашлама кергән, технология югары — шунда уңыш бар. Быел район буенча бер гектарга тәэсир итүче матдәләрдә 40,9 килограмм ашлама кертелгән булса, “Кырлай”да ул — 90, “Ак барс” агрокомплексы”нда — 79,2, “Игенче”дә —74, “Курса МТСы”нда 71 килограмм. Ә менә “Нива”да — 12,1, “Арча” ширкәтендә 16 килограмм гына кергән.
Күп хуҗалыкларда көзге чәчү вакытында кертү өчен ашлама бөтенләй юк.
Көзге культуралар чәчү өчен 9067 гектар (25 мең гектар кирәк) җир әзерләнгән. “Ак барс” агрокомплексы”нда, “Курса МТСы”нда җир тулысынча әзер. “Акчишмә”, “Аю”, “Нива”, “Сафиуллин”, “Шиһабеддинов” хуҗалыкларында бу эшкә әле керешелмәгән.
24 июльгә район хуҗалыкларында бер шартлы терлеккә уртача 18 центнер азык берәмлеге әзерләнде. Иң күп азык “Кырлай” ширкәтендә — 30,6 центнер. “Ак барс” агрокомплексы”нда — 29,6, “Игенче”дә – 25,9, “Курса МТСы”нда 25 центнер туры килә.
Ильяс ФӘТТАХОВ