Тәртибе үзгәрде

Тәртибе үзгәрде
2014 елның 1 гыйнварыннан пенсия җыелмаларын туплау өлешендә мәҗбүри пенсия иминияте буенча иминиятләүчене (дәүләтнеке булмаган пенсия фонды һәм идарәче компания) сайлау тәртибе үзгәрде. Бу хакта тулырак мәгълүмат алу өчен без Арча һәм Әтнә районнары буенча Пенсия фонды идарәсе җитәкчесе урынбасары Гөлназ Ибәтуллинага мөрәҗәгать иттек.
—Үзгәреш нәрсәдә? Иң беренче шуңа ачыклык кертеп китик әле.
—Мәҗбүри пенсия иминияте буенча иминиятләүче булып я Россия Федерациясе Пенсия фонды, я дәүләтнеке булмаган пенсия фонды (сез кайсын сайлап аласыз) тора. Әгәр сез үз пенсия җыелмаларыгыз белән идарә итү өчен шәхси идарәче компанияне сайлыйсыз икән, мәҗбүри пенсия иминияте буенча иминиятләүчегез булып барыбер Россия Федерациясе Пенсия фонды кала. Башка елларда иминиятләнүче гаризаны турыдан–туры дәүләтнеке булмаган пенсия фондына бирә, ә алар аны безгә тапшыра, һәм без, үз чиратыбызда, җыелмаларны автомат рәвештә дәүләтнеке булмаган пенсия фондына күчерә идек. 2014 елдан дәүләтнеке булмаган пенсия фондына, яки дәүләтнеке булмаган бер пенсия фондыннан икенчесенә, я кире Россия Пенсия фондына күчү өчен, шулай ук киләчәктә пенсия җыелмаларын туплап барудан баш тарткан очракта гаризаны Арча Пенсия фонды идарәсенең клиент хезмәтенә бирергә кирәк. Килә алмаган очракта, почта аша хат итеп җибәрергә була. Безгә килеп гариза язмый торып, хәзер дәүләтнеке булмаган пенсия фондына яки башка идарәче компаниягә күчеп булмаячак. Сез үзегезнең дәүләтнеке булмаган кайсы пенсия фонды яки идарәче компания сайлавыгыз турында да әйтергә тиеш буласыз.
—Дәүләтнеке булмаган идарәче компаниядә булганнарга нишләргә?
—Алар шул килеш кала. Быел дәүләтнеке булмаган һәр идарәче компания аккредитация уза. Эреләре кала, ваклары бетерелә. Сез сайлаган дәүләтнеке булмаган идарәче компания аккредитация узганмы, юкмы икәнен Интернет аша сайттан белергә була. Һәрберсенең үз сайты бар. Һәрберсе аккредитацияне төрле вакытта уза. Сайтка керә алмыйсыз икән, Пенсия фондына килеп, клиент хезмәтеннән белергә мөмкин.
—Сайланган дәүләтнеке булмаган пенсия фонды яки идарәче компания аккредитация узмаган очракта тупланган акчалар юкка чыкмыймы?
—Юк, ул кабат дәүләт компаниясенә кайта. Эшне өр–яңадан башларга, ягъни дәүләтнеке булмаган икенче пенсия фонды яки идарәче компанияне сайларга туры килә. Моны 2015 елның 31 декабренә кадәр эшләргә кирәк. Тагын да тулырак мәгълүмат белән Россия Пенсия фонды сайтыннан pfr.rt.ru танышырга мөмкин.
—1967нче елгылар һәм яшьрәкләр 2014 һәм 2015 елларда җыелма пенсияне тупларгамы, юкмы икәнлеген сайларга тиешләр. Бу сайлау ни өчен кирәк?
—Әгәр 1967 елгылар һәм яшьрәкләрнең пенсияләре җыелма өлеше дәүләт Пенсия фондында була икән, ул тулысынча иминият өлешенә күчә һәм пенсия күләмен арттыра. Ә дәүләтнеке булмаган пенсия фондында булса, 6 проценты җыелма өлешендә кала. Монда сайларга була: 2 процентын пенсиянең җыелма өлешендә калдырып, калганын иминият өлешенә җи-бәрергәме, я 6 процентын да җыелма өлештә калдырып, пенсиягә чыкканда шуны бер тапкыр алыргамы? Пенсиянең җыелма өлешендә 2014 елга кадәр тупланган акчалар югалмый. Яңача тупланма өлешне исәпкә алу 2016 елдан башлана. Аңарчы кайсын сайлавыгызны күрсәтеп, Пенсия фондына гариза язарга кирәк.
Гөлсинә ЗӘКИЕВА