Әни, менә сиңа килен...нәр!!!

Әни, менә сиңа килен...нәр!!!
Иске Ашыт халык театры быел яз Илгиз Зәйниевнең “Әни, менә сиңа килен...нәр!!!” комедиясен сәхнәләштереп, авылдашларына берничә тапкыр күрсәткәннән соң, аны күрше–тирә авыл халкы да күрү бәхетенә иреште.
Заманында, 1948 елдан драмтүгәрәк җитәкчесе булып эшли башлаган Саяра Фәтхетдинова, соңрак аның улы Фердинант Фәтхи җитәкләгән чорда, театрның даны еракларга таралып, 1987 елда халык театры дәрәҗәсе алуга ирешкән иде. Соңгы елларда коллективның үзгәрүе яки башка сәбәпләр беләнме, ул дан арткы планга күчте сыман. Ләкин бу спектакль әлеге данны кайтаруга адым булды. Спектакльне сәхнәгә режиссер Илшат Заһидуллин белән бергә Фердинант Фәтхи куйган. Баш режиссер Фердинант абый заманында яратып эшләгән хезмәтен, тормыш тәҗрибәсен дә кулланып, тагын да канатланып башкара. ”Үзе Казанда чакта телефоннан да киңәшләре белән ярдәм итеп тора”, –ди артистлар.
Тамашачыны көләргә дә, уйланырга да мәҗбүр иткән спектакльнең эчтәлеге нидән гыйбарәт соң?
40ны узып бер дә өйләнмәгән Зиннур (Мәннаф Йосыпов) беркөн шабашкага киткән җиреннән хатын — Җәмиләне (Миләүшә Фәттахова) ияртеп кайта. Улы хатынлы, әнисе киленле булуына сөенеп яшәп ятканда, көннәрдән беркөнне үзен егетнең шабашкада чакта өйләнгән хатыны дип таныштырып, Румия (Гадения Фәйзрахманова) кайтып төшә. Шулай итеп йортта ике хатынлы тормыш башлана. Тыныч кына аккан тормыш әкренләп тынычлыгын җуя. Тавыштан туеп Зиннур беркөн күршесе 82 яшьлек Чыңгыз бабай янына кунарга кереп китә. Ә икенче күршесе егетнең тынычлыгы беткәнен күреп, өтәләнеп яшәүче Әкълимә (Гөлсинә Халикова) аны жәлләп үзенә дәшә. Һәм икенче көнне ул да үзен Зиннурның хатыны дип таныштырып, өйгә килеп керә. Кайнана Миңсылу (Зөлфия Фәтхуллина) өч киленле булу “шатлыгыннан” аңын җуеп егыла. Бәхетне еракларда эзләп йөргән егетнең бәхете күршедә генә яшәгән икән лә... Спектакль ахырында Зиннур Әкълимә белән бергә кала. Спектакльдә үзенчәлекле бер персонаж бар — мәңге айнымас сәрхүш Рәхимҗан. Әлеге рольне башкаручы Илшат Заһидуллин 1997 елдан мәдәният йортында режиссер булып эшли. Артистлар һәммәсе төрле һөнәр иясе: Мәннаф Йосыпов —Иске Кенәрдә, Миләүшә Фәттахова Иске Ашытта китапханәчеләр, Галимулла Шәрәфиев бар күңеле белән сәнгатькә бирелгән сәхнә ветераны, Гөлсинә Халикова Мәдәният йорты директоры, Зөлфия Фәтхуллина 40 ел Мәдәният йортында сәнгать җитәкчесе булып эшли, алар инде спектакль куеп чыныккан, ә фельдшер Гадения Фәйзрахманова сәхнәгә тәүге тапкыр аяк басса да, тамашачы мәхәб-бәтен яулауга иреште.
Спектакль узды. Киләчәктә Иске ашытлыларны “Идел–йорт” фестивале сәхнә-ләрендә дә күрербез әле, алар моңа бик өметләнә. Коллективның яңа сулыш белән иҗат итә башлавы, иҗат офыкларының киңлеге яхшы фал. Шул дәрт–дәрман аларны яңа спектакльләр сәхнәләштерүгә, уңышларга этәрер.
Розалия ЗИННӘТОВА