Чәчәк үстерү––савап

Чәчәк үстерү––савап
Чәчәкләрне күңел көзгесе, диләр. Алар искиткеч зур көчкә ия. Игътибар итеп караганыгыз бармы, яратканың яки якының чәчәк бүләк итсә, төшенкелеккә бирелгән чагың булса да, йөзең яктырып китә, күзләреңә кадәр елмая башлый. Ә җәен бакчада үзеңне чәчәкләр дөньясында итеп тоясың.
Безнең шәһәребез дә, җәй җиттеме, чәчкәләр патшалыгына әверелә. Арча үзәге аша үткәндә андагы матурлыкка күз төшерми, сокланмый мөмкин түгел. Хәер, үзәктә генә түгел, хәзер калабызның кайсы почмагына барма, шундый хозурлыкка тап буласың. Әмма чәчәкләр үзләреннән–үзләре үсми. Карап, сабый баладай тәрбияләп, вакытында чүбен утап, су сибеп торганда гына шундый гүзәллекне тудырып була. Бакчада, капка төпләрендә чәчәкләрне һәркем үз зәвыгы белән үстерә. Ә менә урамнардагы газоннарны карап тору “Жилкомбытсервис” ширкәтенә тапшырылган. Кызлар чүп утаса, чистартып торса, көн дә иртән, кичен су сибү Закир Хәкимовка йөкләнгән.
Армиядә хезмәт иткән вакытыннан бирле 25 ел шофер булып эшли ул. Бу оешмада 2009 елдан. Өченче җәен газоннардагы чәчәкләргә, яшь агачларга су сибә.
––Машиналар йөри башлаганчы иртән сәгать дүрттә яки биштә чыгам, кичен тагын хәрәкәт туктагач эшкә керешәм һәм сәгать 10–11ләргә кадәр су сибәм,––ди Закир.––Хезмәтеңне яратасыңмы, диләр. Яратмасаң эшләп тә булмыйдыр ул. Син су сибеп үстергән гөлләр тора–бара аллы–гөлле чәчәкләргә төренеп, тирә–якны матурлаганны, кешеләрне сөендергәнне күрү кемгә күңелле түгел?
Арча үзәгендәге генә түгел, тимер юл вокзалы, стадион каршындагы, Борһанов, Интернационал, Зур, Зәйнуллин урамнарындагы, Бирәзә тау башындагы һәм башка урыннардагы газоннарга су сиптерә ул.
––Өйдә дә чәчәкләр күп безнең. Аларны карау күбрәк хатыным Ләйсирә белән кызларым Ләйсән, Ландышка эләгә,––ди Закир.––Бакчага килеп керүгә матурлык күзгә ташлана. Урамнарны да шулай газоннардагы чәчәкләр бизи. Кешеләр аларны сакласыннар һәм соклансыннар иде.
Закир машинасына утырды да, юлын дәвам итте. Артыннан кояш нурларында ялтыраган көмеш су тамчылары чәчәкләрне коендыра барды. Көндезге эсседән соң әлсерәгән чәчкәләр, рәхмәт әйткәндәй башларын иеп, җиңел сулап калды. Чыннан да, матурлыкны тудыра гына түгел, саклый да белергә кирәк.
Гөлсинә ЗӘКИЕВА