Вакыт ашыктыра

Вакыт ашыктыра
Ташкичү авыл җирлегендә ягу сезонына әзерлек, торак пунктларның, территорияләрнең төзеклегенә багышланган киңәшмә узды. Авыл җирлекләре башлыклары, район мәгариф, мәдәният идарәләре, сәламәтлек саклау өлкәсе вәкилләре өчен урындагы хәлне күреп, таләпләрне белеп кайту, үзләрендәге кимчелекләрне бетерү максатында оештырылды әлеге күчмә киңәшмә.
Берәр комиссия яки тикшерү киләсе булса, гадәттә, бу турыда урыннарга алдан хәбәр ителә һәм күр-сәтеләчәк объектның тәр-типкә китереп куелуы турында һәркем белә. Ә Ташкичү авыл җирлегенә әлеге киңәшмә булачагы турында алдан хәбәр итмәгәннәр. Махсус шулай эшләгәннәр, ничек бар —шулай күрер өчен. Ә күргәннәр уңай тәэсир калдырырлык булды. Район башлыгы урынбасары Любовь Осина тарафыннан да бары уңай бәя генә алынды. Социаль объектларның, мәгариф учреждениесе биналары котельныйлары тиешле таләпләр буенча тәртипкә китерелгән. Әмма һәр ел таләпләргә үзгә-решләр кертелә. Тикшерү барышында контроль–күзәтү өлкәләре вәкилләре: район башкарма комитетының инфраструктура үсеше секторы мөдире Илфат Рәхимов, “Сабагаз” ширкәтенең Арча районындагы җитәкчесе Илшат Сабиров, “Ростехнадзор”дан Рөстәм Әхмәтҗанов, Илһам Сабиров, “Газстройгарант” ширкәтеннән Руслан Хәмитов, “Тепло–Сервис” ширкәте җитәкчесе Тәлгать Миндубаев, Яңа Кенәр торак–коммуналь хуҗалыгы вәкилләре һәр котельныйны барлап, ничек эшләнергә тиешлеген аңлатып, киңәшләрен бирделәр.
Соңгы елларда гына да районда 60лап газ казаны яңага алмаштырылган. Ә Ташкичү авыл җирлегенә кергән Ташкичү һәм Иске Ашыт мәктәпләренә яңа модульле котельныйлар урнаштырылган. Барлык та-ләпләргә туры китереп эшләнгән әлеге котельныйларда шартлар уңай. “Яңа модуль котельный эшләт-сәң, бөтен проблемаң бетә”, — ди авыл җирлекләре башлыклары. Әмма аны кую күп чыгымнар таләп итә. Котельныйларда махсус курслар үткән операторлар эшләргә тиешлеге инде күптән куелган таләп. Алар 5 ел саен аттестация узарга тиеш.
Һавага газ чыгуын билгели торган сигнализаторлар куюны Руслан Хәмитов ягу сезоны башланганчы тәмамларга планлаштыра. Әле андый җайланмалары булмаган социаль объектларның саны район буенча 100дән артып китә.
Ягу сезонына әзерлеккә ныклап тотынучыларга әлләни кайгырасы юк, җитешсезлекләрне бетерү өчен шактый вакыт бар, ә менә эшен сүлпән алып баручыларга ашыгу сорала. Чөнки таләп һәммәсенә бер: 25 августка котельныйлар ягу сезонына әзер булырга тиеш.
Розалия
ЗИННӘТОВА