Изге гамәлләр ае

Изге гамәлләр ае
27 июльдә барлык мөселманнар өчен изге ай —Рамазан ае тәмамланды. 28 июльдә барлык мәчетләрдә бәйрәм намазлары укылды. Арча шәһәрендә, авылларда быел гает намазларында кеше аеруча күп иде.
Районыбыз мөселманнарын муниципаль район башлыгы Алмас Назиров Ураза бәй-рәме белән котлады. “Бу—берләшү, чын кыйммәтләрне, туганлыкны, дуслыкны ныгыту бәйрәме. Бик күпләр Аллаһ ризалыгын өмет итеп 30 көн дәвамында таңнан алып кичкә кадәр хәләл ризыктан, судан тыелып торды. Бу мохтаҗларның, ятим-нәрнең, ачлык, юклык белән яшәүчеләрнең халәтләрен аңларга мөмкинлек бирде. Рамазан аеның нигезендә игелек, шәфкатьлелек, якыннарың турында кайгыртучанлык кебек гомумкешелек кыйммәтләре ята. Бу айда без барча уй–ниятләребезне бер–беребезгә рәхим–шәфкать күрсәтүгә һәм игелек кылуга юнәлттек. Шунысы куанычлы: дин тотучыларыбыз рухи–әхлакый нигезләргә һәрвакыт тугрылыклы, алар ислам дине традиция-ләрен кадерләп саклый, шул ук вакытта заман таләпләренә дә җавап бирә. Дин кар-дәшләребез алга таба да игелек–мәрхәмәт таратып, халкыбызның рухи байлыгын арттырыр, дип ышанабыз”.
Рамазан— мәрхә-мәтле һәм шәфкатьле булырга өйрәтә торган ай. Бу айда мәр-хәмәтле эшләрдә бер-ләшү мисаллары безнең районда да бихисап.
Соңгы елларда хуҗалык, җирлек башлыгы, мәктәп директоры һәм авыл имамының бер–берсен аңлашып, киңәшеп эшләүләре гадәти күренешкә әйләнеп бара.
Киңәшле эш таркалмас, диләр. Дин кешеләрне һәрвакыт яхшылыкка гына өндәгән. Шушы урында бер вакыйганы искә төшерәсе килә. Дингә каршы бик көчле көрәш барган елларда булгангамы, һич онытылмый ул.
“Курса” колхозында рәис булып эшләгән Равил Хәкимов (халык бик ярата иде аны) Үзбәкстандагы туганнарыннан кунактан кайткач, ул еллар өчен бик гаҗәп булып тоелган хәл турында сөйләгән иде. Үзбәкстан — ул вакытта СССР составындагы союздаш республика. Безнең рәиснең андагы туганы шулай ук колхоз рәисе икән. “Иртән бар кеше белән мәчеттә намаз укый, намаз беткәч, колхоз эшенә нәрәт бирә”. Чыннан да, моннан кемгә нинди зыян соң? Динле, иманлы кеше колхоз эшендә дә әйбәт эшләячәк, иң мөһиме — урламаячак.
Рамазан бәйрәме алдыннан Күпербаш авылында күңелләрне җилкендергән вакыйга булып алды. Шәһәр Советы составына кергәч, бу авылда, гомумән, шатланырлык хәлләр булып тора. Юллары яхшырды, күперләр яңарды, кыш көне йокыдан торганчы юллары чистартылган була. Авыл халкының да күңеле үсеп китте. Рәүф Сөнгатов тырышлыгы белән мәчетле булдылар. Менә шушы мәчеттә җыйналып, зират коймасын яңарту турында да киңәшләштеләр. Анда Арча шәһәр башкарма комитеты җитәкчесе Рафил Исмәгыйлев та катнашты. Шушы авылда туып–үскән эшмәкәрләр Илнур Газизов, Алимас Әмиров төп чыгымнарны үз өсләренә алдылар. Илнур Газизов бөтен металлны бирде, авыл кешеләре дә үз өлешләрен кертте. Рамазан аенда яңа койма тотылып бетте, капкалар куелды.
Алимас Әмиров ифтар ашы үткәреп, авылдашларын табын артына җыйды, зират коймасын тотуга зур өлеш кертүчеләргә бүләкләр тапшырды.
Менә шундый изге гамәлләр белән истә кала торган ай ул Рамазан ае.
Ильяс ФӘТТАХОВ