Онытылмаслык көн

Онытылмаслык көн
Бер ай элек шатланып каршы алган кунагыбыз инде китеп тә барды. Әле кичә генә кебек... 27 июнь көндезен өйгә кайтканда “Бүген кичкә беренче тәравих бит инде”, дип уйлап алган, беренче тәравихны укыган төн, әле генә 28 июнь, уразаның беренче көне иде. Шундый күп нәрсә эшләнер төсле тоелган бу изге айда, күпме генә эшләнсә дә, күбесенә өлгерелмәгән кебек, үкенечле тойгылар баса күңелне, ниндидер әрнү, күңелсезлек хисләре дә битәрләп ала.
Күз йомганчы үтте дә китте бу көтеп алган ай. Бик күңелле шул ул Рамазан ае, мөселманнарның берләшүе, бер дулкында булуы, көн саен гаилә белән бергә сәхәр, ифтар ашау, кунакка йөрешү, үзеңә кунак кабул итү, тәравихларда очрашу, бергә бер сафта намаз уку, Рамазан аена багышланган чараларда катнашу, телевизордан Рамазан ае турында сөйләүләре, “тоткан уразаларыгыз савапка булсын” дип теләүләре күңелдә җылылык, бәйрәм хисе уята иде.
11 айның солтаны—Рамазан ае инде быелга тәмам булды, аның каравы олуг бәйрәм —Ураза бәйрәме җитте. 28 июль көнне менә шул бәйрәмне билгеләп үтәргә Арчаның үзәк мәчетенә кунаклар, ата–аналар, балалар җыелган иде. Аллаһның ярдәме белән яхшы гына барып чыкты бу олуг бәйрәм. Аны оештыруда ата–аналар, ярдәмчеләр, Арча районы волонтерлык үзәге хезмәткәрләре бик булышты. Балалар өчен төрле кызыклы уеннар, чаралар, бүләкләр әзерләнгән иде. Бәйрәм Коръәннең “Әл–Фәтиха” сүрәсе белән башланып китте, аны кечкенә шәкерт Шамил укыды. Бәйрәмне оештыручылар балаларга дини темаларга кагылышлы сораулар бирде, мавыктыргыч бәйгеләр булды, катнашучы нарасыйлар матур бүләкләр алды. Балалар бик теләп уеннарда катнашып, вакытларын күңелле үткәрде, ата–аналар да балалары өчен җан атып, йөрәк парәләре өчен шатланып торды. Ахырда, балаларның Коръән уку бәйгесеннән соң, барлык кунакларны татлы тәгамнәрдән сыгылып торган табынга, Хаҗгали абый пешергән пылаудан авыз итәргә чакырдылар. Кунаклар сыйланып алганнан соң, һәрбер балага күчтәнәчләр өләшенде. Волонтерларны да калдырмадылар, аларга истәлекле бүләкләр тапшырылды. Килүчеләр барысы да канәгать булып, шатланышып, бер–берләрен кат–кат Ураза бәйрәме белән котлап, шундый бәйрәмнәрнең дәвамлы булуын теләп, таралышты. Шул рәвешле, Арчаның үзәк мәчетендә бәйрәм тантана итте. Тоткан уразалар савапка булса иде, изге гамәлләребез кабуллардан китсен. Аллаһның рәхмәтендә булыйк! Алдагы елларда да тынычлык белән бергәләшеп каршы алырга насыйп булсын Рамазан айларын.
Луиза КОРБАНОВА