Эшкә карап бәялиләр

Эшкә карап бәялиләр
Республикабызда гамәлдә булган күп проектлар арасында “Авыл клублары” дигәне дә бар. Безнең районда шушы программа кысаларында Төбәк–Чокырча, Сикертән, Симетбаш, Пөшәңгәр авылларында күп функцияле мәдәни–спорт үзәкләре ачылды.
“Бердәм Россия” партиясенең Татарстан төбәк бүлекчәсе инициативасы белән яңа ачылган мәдәни–спорт үзәкләрендә күрше районнарның иҗат төркемнәре чыгыш ясый башлады. 30 июльдә Сикертән авылында Биектау районы һәвәскәрләре чыгыш ясады. Арчалылар Биектау районына китте.
Сикертән мәдәни–спорт үзәгендә концерт алдыннан Татарстан Республикасы Дәүләт Советына “Бердәм Россия” партиясеннән депутатлыкка кандидатлар Бөтендөнья татар конгрессы башкарма комитеты рәисе Ринат Закиров, “Татнефте-продукт” акционерлык җәмгыяте генераль директоры Рөстәм Сабиров белән очрашу булды.
Ринат Закиров безнең районда, шул исәптән Сикертән якларында да билгеле шәхес. Ул Татарстан Республикасы Дәүләт Советына безнең районнан сайланган депутат, сайлаучылар белән еш очраша, районыбыз халкы мәнфәгатьләрен кайгыртып яши. Быел 14 сентябрьдә булачак сайлауларда ул “Бердәм Россия” партиясеннән бер мандатлы округ буенча кандидат итеп күрсәтелде.
Ринат Закиров депутат буларак башкарган эшләре, киләчәктә республика, милләт алдында торган бурычлар, проблемалар, аларны хәл итү юллары турында сөйләде.
Рөстәм Сабиров үзебезнең Арча районында туган, озак еллар “Арча нефть продуктлары” акционерлык җәмгыятен уңышлы җитәкләгән кеше. Ул “Бердәм Россия” партиясе исемлеге буенча кандидат булып бара, шуңа ул күбрәк әлеге партия җитәкчелегендә республикада башкарылган эшләр, якындагы елларда тормышка ашырылачак планнар турында сөйләде.
Арча муниципаль район башлыгы, “Бердәм Россия” партиясенең җирле бүлекчәсе политсовет секретаре Алмас Назиров үзенең чыгышында республика проектларының безнең районда уңышлы тормышка ашырылуын әйтте. Яңа төзелешләр, мәктәпләрне, фельдшер–акушерлык пунктларын төзекләндерү, юллар төзү —аларның һәркайсы халыкның тормыш дәрәҗәсен күтәрү, яшәешен яхшыртуга юнәлдерелгән. Идарәче партия — “Бердәм Россия” партиясенең бу юнәлештәге планнары зурдан.
Ильяс ФӘТТАХОВ