Урамнарга асфальт җәелә

Урамнарга асфальт җәелә
Юллар, юллар...Урамнарында асфальт булганнарны сөендерә, юкларны көендерә. Бүген берәүнең дә яңгырлы көннәрдә пычракка батып йөрисе килми. Асфальттан керт–керт атлап йөрүгә ни җитә. Шуңа, җәй җитүгә, шәһәр урамнарына асфальт җәя башлагач, күңел сөенә.
—Бу эш 3 максатчан программа нигезендә быел гына алып барыла башлады. Шуларның берсе–муниципаль районныкы, икесе республика программасы,—ди район башкарма комитетының инфраструктура үсеше буенча бүлек архитекторы Марат Гәрәев.—Ягъни, Арча шәһәре һәм авылларындагы урамнарны карап тору урындагы властька йөкләнгән, ә республика юлларны төзекләндерү һәм төзү буенча юл хуҗалыгы өлкәсендәге төрле программаларны тормышка ашыруда безгә ярдәм күрсәтә. Төзекләндерергә яки төзергә тиешле урамнар исемлеге гражданнарның район башлыгына, җитәкчеләргә, халык контроле системасына мөрәҗәгатьләре нигезендә төзелде.
Бер программа буенча Арча шәһәрендә Бакча урамы (үзәк мәчет каршында), стадион, Галактионов, Гагарин, Комаров, Дуслык, Тынычлык, Пионер, Совет, Таң урамнары норматив хәлгә китерелде. Барлыгы 15 миллион сумлык эш башкарылды.
Муниципаль юл фонды исәбенә Жуков–Банк урамнарындагы күпкатлы йортларга керү юлларына, Вахитов, Сафин, Күпер, Заречная, ВЛКСМның 70 еллыгы урамнарына асфальт салынды. Бу эш 26 миллион 800 мең сумга төште.
“Авылларда урамнарны норматив хәлгә китерү” турындагы республика программасы нигезендә районда барлыгы 20 миллион сумлык эш алып барылды. Шуның яртысы Арча шәһәре, яртысы авыл юлларын карау өчен бүленеп бирелде. Монда сүз вак таш түшәү турында гына бара. Бу программа буенча Көнбатыш микрорайонындагы 12 күп фатирлы йортка илтүче юлга, Арча станциясендәге яңа төзелеп килүче балалар бакчасына, Кызыл Бистә урамындагы 3 күп фатирлы йортка, Айвандагы фельдшер–акушерлык пунктына, Пөшәңгәрдәге авыл клубына ке-рүче юлларга вак таш җәю, Арча станциясендәге Төзүчеләр, Түбән Мәтәскәдәге Яшьләр, Яңа Иябаштагы Үзәк, Наласадагы Вахитов һәм Яшьләр урамнарын норматив хәлгә китерү күздә тотыла.
Урам юлларын төзекләндерү һәм төзү өчен акча каян килгән соң? Бу сорау күпләрне кызыксындырадыр дип уйлап, җавап алу өчен район финанс–бюджет палатасы җитәкчесе Зөлфәт Шәрәфетдиновка мөрәҗәгать иттек.
—Нефть продуктларын сатудан кергән салым акчасын республика районнарга тарата. Районда юл фонды төзелде һәм шул акчага юллар карала. Арча шәһәре эчендә план нигезендә 26 миллион 800 мең сумлык эш башкарылырга тиеш. Бүгенгә шуның 12 миллион сумы керде инде,—диде ул.
Безнең район территориясе аша үткән Татарстан Республикасының гомуми куллану юллары булган Ашытбаш—Шушмабаш—Карадуган юлының бер өлеше, Олы Әтнә—Ташкичү юлы асфальтлана, Чиканаста Бирәзә елгасы аша салынган күпер төзекләндерелә.
Гөлсинә
ЗИННӘТОВА