Югалган көн югалтуларга китерә

Югалган көн югалтуларга китерә
Сүзне тагын “Татарстан” ширкәтеннән башларга туры килә. Быелгы урып–җыюны әйдәп баручы әлеге хуҗалыкта басуларда тулы көчкә эшлиләр. Арышны уралар да, турыдан–туры суктыралар.
— Менә бу басуны турыдан–туры урып–җыйдык, — ди хуҗалык рәисе Рүзәл Мәрданов. — Дымлылык 19 процент.
Тугыз комбайн арышны урып–җыя, ике трактор саламны рулоннарга туплый. Чәчүгә җир әзерлиләр, туфракны төп эшкәртүгә керешкәннәр.
“Татарстан” ширкәтенә бер комбайнга туры килә торган мәйданнар буенча борчылырлык урын юк. Әмма алар урып–җыюга иң алдан керешеп, барлык көчне туплап үстерелгән уңышны вакытында җыйнап алу өчен тырыша. 494 гектарда арыш урылып, шуның 294 гектары суктырылды.
Комбайннарга иң күп мәйданнар туры килгән “Арча” ширкәтендә уракка иң алдан керешергә тиешләр кебек иде. Шул ук “Татарстан” ширкәте белән янәшәдәге басуларына күптән чыгарлык. Эш күләме аз түгел. 3550 гектардагы арышка 4400 гектар берьеллык үләннәрне дә өстәргә кирәк. 30 июльгә берьеллык үләннәрнең — 890, арышның 200 гектары урылган. Ургычлар аз булу да кыенлык тудыра. Әле бит шушы берьеллык үлән җирләрен арыш чәчәргә әзерләргә кирәк булачак.
Әлеге хуҗалыкка кергән авылларда пай җирләре өчен печән бирелмәүдән зарланалар. Быелгы муллыкта халык ризасызлыгын тудыру өчен җитәкченең аерым осталыкка ия булуы кирәктер. Печәнен дә сыер асраучылар гына сорый бит әле аның. Ә алар бик күпкә дә җыелмыйдыр.
— Быел печән белән проблема булырга тиеш түгел, — ди район авыл хуҗалыгы һәм азык–төлек идарәсе җитәкчесе Айдар Габбасов. — Күпьеллык үләннәрнең икенче кат уңышы да начар булмаячак. Без хуҗалык җитәкчеләренә авыл җирлекләре аша шәхси хуҗалыклардан күпме ашлык кирәклегенә гаризалар җыярга тәкъдим иттек. Быел ашлыкны да җитәрлек бирү мөмкинлеге булачак.
“Мәрҗани” ширкәтендә 3952 гектардагы берьеллык үләннәрнең 401 гектары гына урылган килеш.
“Акчишмә”, “Сафиуллин”, “Шиһабеддинов” хуҗалыкларында арыш урагы башланмаган.
Әлегә район буенча бер гектардан уртача уңыш — 22,8 центнер. “Северный”да — 27, “Курса МТСы”нда — 25, “Арча” ширкәтендә 14 центнер гына.
“Ак барс” агрокомплексы”, “Ватан”, “Курса МТСы”, “Северный” хуҗалыклары барлык чәчеләсе мәйданнарны эшкәртеп, әзерләп куйдылар.
Ильяс СӘХӘПОВ