Бердәм коллектив

Бердәм коллектив
Яңа Кенәр мәдәният йортының җитәкчесе дә, хезмәткәрләр дә—бар да урам якта буяу эшләре белән мәшгуль.
—Узган ел бинаның эчен тәртипкә китергән идек, быел тышкы ягын матурларга булдык. Барысын да үз көчебез белән тапкан акчага башкарабыз, — диде директоры Наҗия Әхмәтҗанова.—Менә ун елдан артык инде 1 августта мәдәният йорты каршында Кенәр кичләре үткәрәбез. Шуңа да әзерлек булыр. Бөтен ялга кайткан авылдашлар, сыйныфташлар, дусларны очраштырган бик матур җырлы–биюле, уенлы бәйрәм була ул.
Шуңа өстәп Наҗия Әхмәтҗанова белән сәнгать җитәкчесе Сиринә Әхмәтханова һәр бәйрәмне концерт-лар, кичәләр белән билгеләп үтүләре, авыл халкының яратып каравы, үзләренең дә актив катнашулары турында сөйләделәр.
—Без күбрәк тематик кичәләр оештыруга басым ясыйбыз,—ди мәдәният йорты җитәкчесе.—Балаларны, яшьләрне, өлкән-нәрне дә сәхнәгә тартырга тырышабыз. Яшьләр белән, мәсәлән, Гашыйклар көне уңаеннан үткәрелгән кичә бик кызыклы чыкты. Балалар белән Галимҗан Гыйльманов пьесасы буенча спектакль куйдык. Тамашачыларга, аеруча әти–әниләргә балаларның чыгышы бик ошады.
20 еллык сәхнә стажы булган үзешчән җырчы Алмаз Фәйзрахманов белән 14 ел дәвамында сәхнәдән төшмәгән җырчы Марат Сәлаховның иҗат кичәсен дә кенәрлеләр җылы кабул иткән. Хәзер Татарстанның атказанган мәдәният хез-мәткәре, үзешчән композитор, курайда уйнау остасы Салих Хисмәтуллинның 100 еллыгын билгеләп үтүне, анда кызы Рәшидәне дә чакыруны планлаштыралар. Шулай ук Яңа Кенәр җирлегенә кергән авыллар мәдәният йортлары һәм клублары җитәкчеләрен бәйгедә сынау да көн кадагында тора.
—Һәр чараны китапханә, Яңа Кенәр лицее, иҗат йорты, интернат–мәктәп укучылар һәм укытучылар коллективлары белән берлектә оештырабыз. Аларга без бик рәхмәтле. Шулай ук район, авыл җирлеге, безнең җирлектәге оешмалар җитәкчеләре дә һәрдаим ярдәм итәргә әзер тора. Халык белән бербөтен булып эшлибез. Бездә сәнгатькә гашыйк кешеләр бик күп. Кайчан һәм кемгә барма, бервакытта да каршы килмиләр, кичәләрдә бик теләп катнашалар,—ди директор.
Яңа Кенәр мәдәният йортының “Яшьлек иле” дигән өлкәннәр, “Тамчы” биюче балалар, “Их, шома басабыз” биюче яшьләр коллективлары, “Кенәри” балалар фольклор, “Яран гөл” балалар драма, “Умырзая” җыр түгәрәкләре уңышлы гына эшләп килә.
Сәхнә ветераннары белән дә горурлана кенәрлеләр. Җырчылар Саймә Нигъмәтҗанова, Равилә Хөсәенова, Алсу Терентьева, Венера Хәбибуллина, баянчылар Нәкыйп Галимҗанов, Әхәт Сәфәргалиев, нәфис сүз остасы Дилбәр Хәкимова, олы яшьтә булуга карамастан, сәхнәдән төшмиләр. Җырчы Мәхмүт Хәйруллин ТНВ каналында барган “Җырлыйк әле” тапшыруында чыгыш ясаган, җырчы Фәния Хәлитова “Балкыш”та җиңү яулаган, Рәмзия Вәлиуллина сценарийлары, эшлекле киңәш-ләре, нәфис сүз остасы, юмористик хикәяләр авторы Габделбәр Сабиров бүгенге көн темасын яктырткан скетчлары белән ярдәм итә.
—Яшьләр дә бик сәләтле,—ди Наҗия ханым.— Биючеләр Раил Зәйнуллин, Айнур Зәйнуллин, Дамир Хәбибуллин, җырчы Алсу Шакирова концерт, кичә саен сәхнәдә. Коллектив бик бердәм безнең. Хезмәт-кәрләребез үзләре дә сәхнәдән төшми.
Наҗия Әхмәтҗанова үзе җырлый да, бии дә, скетчларда да катнаша, алып баручы да. Дүрт яшеннән сәхнәдә “Чабата” биюен башкара. Сәнгать җитәкчесе Сиринә Әхмәтханова да өч яшеннән сәхнәдә җырлый. Методист Роза Ермакова үзе дә оста биюче, бию түгәрәкләрен, фитнес–клубны да алып бара, кыш җиттеме, шугалакта фигуралы шуарга өйрәтә. Техничкалар Гөлчәчәк Карпова белән Алсу Әсхәдуллина да чын сәнгать кешеләренә әверелгән. Гөлчәчәк дуэтта җырлый, бии, скетчларда катнаша, Алсу оператор, алып баручы, биюче. Мондый сән-гатькә гашыйк коллектив, ярдәм итәргә әзер торучы халык, сәхнәне үз иткән үзешчәннәр һәм теләк барында таулар күчерергә дә була.
Гөлсинә ЗӘКИЕВА