Халык белән киңәшеп

Халык белән киңәшеп
4 августта Татарстан Республикасы Дәүләт Советына “Бердәм Россия” партиясеннән депутатлыкка кандидатлар “Казан” милли мәдәни үзәге директоры Закиров Ринат Зиннур улы, “Татнефтепродукт” акционерлык җәмгыяте генераль директоры Сабиров Рөстәм Наил улы Пөшәңгәр авылында халык белән очраштылар.
Очрашу быел ачылган күп функ-цияле мәдәни үзәктә үтте. Ринат Закиров аны ачу тантанасында катнашкан иде.
— Республикада гамәлдә булган проектларның берсе сезнең җирлектә ничек тормышка ашырылуына мисал, — диде ул. — Халкыбыз эшчән безнең, республикада бөтен җирдә үсеш бара. Авылларны саклау бик мөһим, чөнки авыллардан башка татарның киләчәге юк.
Ринат Закиров авыл кешеләрен борчыган мәсьәләләргә тукталды, авылга кагылышлы программалар нәкъ менә шул проблемаларны хәл итүгә юнәлдерелгән.
Рөстәм Сабиров “Бердәм Россия” партиясе тарафыннан тәкъдим ителгән проектлар турында сөйләде. Алар арасында турыдан–туры авылга кагыла торганнары да бар.
Муниципаль район башлыгы Алмас Назиров соңгы елларда районда булган үзгәреш-ләргә тукталды.
— Саный башласаң — бик күп алар, — диде ул. — Ә бит тормыш гел алга бара, үз та-ләпләрен куя. Менә быел Арчада 260 урынлы балалар бакчасы, Боз сарае сафка басачак. Арча шәһәренә яңа мәдәният йорты кирәк. Авылларда да шулай, әле юлсыз авыллар булуы борчый. Быел юллар төзүгә игътибар аеруча зур булды. Шулай барса, якындагы елларда юлларыбыз яхшырачак.
“Ватан” ширкәте җитәкчесе Мансур Әхмәтов хәзерге тормышның бик тиз адымнар белән әйбәт якка үзгәрүен әйтте. “Элек сайлауга килгәндә сугышлар гына булмасын, ачлык булмасын, — ди торганнар иде. — Хәзер тамагыбыз тук, яшәү шартлары уңай. Бары тик тырышып эшләргә генә кирәк”.
Ильяс ФӘТТАХОВ