Берәүләр арыш урагын төгәлли...

Берәүләр арыш урагын төгәлли...
2 августта видеоконференция режимында үткән киңәшмәдә ТР Премьер–министры урынбасары, авыл хуҗалыгы һәм азык–төлек министры Марат Әхмәтов игеннәрне урып–җыю темпын тизләтүнең бүген иң төп бурычларның берсе булуын белдерде.
Республикада инде көзге культураларны һәм борчакны урып–җыюны төгәл-ләүче хуҗалыклар бар. Хезмәтне дөрес оештыру һәм җаваплылык хисе тоеп эшләү бик зур роль уйный.
Премьер–министр Илдар Халиков һәр тәүлекнең югалтуларга китерү ихтималын искәртте. Шуңа күрә урып–җыю барышын дөрес оештыру аеруча мөһим.
Муниципаль район башлыгы Алмас Назиров районда урып–җыюның барышы әлегә канәгатьләнерлек булмавын әйтте. Басу кырыйларын алдан урырга дигән тәкъдимне дә күп хуҗалыклар үтәмәде. Тәртип дигән нәрсә әнә шуннан башлана.
5 августка район хуҗалыкларында 8774 гектардагы игеннәр урылды, 5498 гектарда (10 процент) суктырылды.
“Кырлай” ширкәте — 27, “Курса МТСы” — 22, “Татарстан” ширкәте 19 процент мәйдандагы игеннәрне урып–җыйды. “Ватан”да — 13, “Северный”да 11 процент.
“Нива”, “Сафиуллин”, “Шиһабеддинов” хуҗалыкларында урган да, суккан да мәйданнар юк.
“Курса МТСы” ширкәте арыш урагын төгәлләде. “Кырлай” ширкәте төгәлләп килә.
Районның сыйфат комиссиясе 4 августта “Ак барс” агрокомплексы” ширкәтендә булды. Иң беренче бу хуҗалыкта урып–җыю эшләренең зур оешканлык белән алып барылуын әйтергә кирәк. Комбайннар янында һәрвакыт җаваплы кешеләр бар, эш барышында килеп туган мәсьәләләр шунда ук хәл ителә. Баш агроном Рөстәм Мөхәммәдиев тиз арада махсус прибор белән дымлылыкны билгели, шуннан киңәшеп, нәрсә эшләргә икәнлеген хәл итәләр. Бер басуның үзәнлерәк ягында дымлылык 22–23 процент күрсәтә иде.
— Орлыкка алырбыз, — дигән идек, — ди баш агроном. — Хәзер үрлерәк ягын тикшереп карыйбыз.
Ә анда дымлылык — 16,5 процент. Комбайннар белән әнә шулай маневр ясап, вакытны әрәм итмичә эшлиләр. Дымлылык югарырак булудан да курыкмыйлар хуҗалыкта, киптергечләр белән дә хәл яхшы. Колхозлар чорында бөтен хуҗалыкларда бар иде алар. Хәзер инде күбесенә басуда кипкәнне көтәргә туры килә.
Ильяс ФӘТТАХОВ